Jubel ved munnbindfabrikk i Sykkylven

(NPK): Eit stortingsvedtak om at det skal lagast meir smittevernutstyr i Noreg, er godt nytt for munnbindfabrikken Innovern i Sykkylven.

– Vedtaket i Stortinget er gull verdt for oss. Ja, det var kanskje heilt avgjerande, seier styreleiar for fabrikken Leif Jarle Aure til Sunnmørsposten.

Han fortel at fabrikken i desember er ferdig med ein stor ordre med å produsera 20 millionar munnbind til helsevesenet i Noreg og at dei treng nye, langsiktige avtalar for å sikra produksjonen.

Etter stortingsvedtaket om å styrkja produksjonen i Noreg, ser munnbindfabrikken i Sykkylven ser lysare på framtida. Vedtaket inneheld fleire punkt der Stortinget ber regjeringa om å leggja til rette for at det blir laga meir smittevernutstyr i Noreg.

Leiinga ved fabrikken har særleg festa seg ved det siste punktet. Der heiter det ifylgje avisa «Stortinget ber regjeringa etablere beredskapsavtalar med norske produksjonsmiljøet for produksjon av smittevernutstyr».

– Dette siste punktet er gull verdt for oss, seier Leif Jarle Aure.

(©NPK)