Kommunar kan tene millionar på ny lakseskatt

ID: 13271001(NPK):
SV har kome med forslag om å krevje inn ei kommunal avgift på oppdrettsfisk. Dette kan gi mange kommunar millioninntekter.
SV foreslår i sitt alternative statsbudsjett å påleggje oppdrettsnæringa ei avgift på 25 øre per produsert kilo fisk, skriv Klassekampen.
SV har sett seg lei på at oppdrettsnæringa har skattefordelar som ikkje andre bransjar har. Det er bakgrunnen for at dei no foreslår ei ny lakseavgift.
– Oppdrettsnæringa har gått frå å vera ei lokal attåtnæring til å bli ein diger milliardindustri, med store eigarkonstruksjonar og multinasjonale selskap. Og dei lever nærast i eit skatteparadis i kommunane i Noreg, seier fylkesleiar Gina Barstad i Hordaland SV til NRK.
Inspirert av Skottland vil SV at oppdrettsnæringa skal betala ein skatt per kilo produsert fisk, og pengane skal gå rett til kommunane som ekstrainntekt.
Finansdepartementet har rekna på kiloprisen til SV. Totalt vil skatten gi kommunane landet rundt totalt over 270 millionar kroner i årlege ekstrainntekter.