Kraftig fall i hyttebygginga i år

NPK-NTB/NETT NO: Hyttebygginga i Noreg har falle kraftig, og ingen trur på ei rask betring av marknaden.

I 2021 vart det gitt 7.454 løyve til å setje i gang bygging av fritidsbustader i Noreg. I 2023 vart det gitt 3.028 igangsetjingsløyve, og i år kan talet ende på rundt 1500, skriv Finansavisen.

I fjor haust sa dagleg leiar Inge Olsen i selskapet Harevadet Hyttergrend i Hornindal i Volda kommune til Nett No at han meint marknaden snudde allereie tidleg i 2022. For han og dei andre grunneigarane som opparbeidde 140 hyttetomter ved Hornindal Skisenter hadde bremsen i marknaden ikkje så stor betydning, sidan storparten av tomtene allereie var selde medan etterspørselen framleis var høg.

På landsbasis er det verre. Fleire hyttebyggjarar har gått konkurs, tomteeigarar slit, og lokale handverkarar har færre oppdrag. Grunneigar og tomteutviklar Jon Halbjørhus har berre selt éin hyttetomt i Hemsedal i år, men er ikkje bekymra.

– Totalt har vi 72 tomter som skal seljast, men det er inga hast. Eg er glad vi slepp å vere avhengige av sal, seier han til avisa.

Eigedomsmeklar Christian Haatuft i EiendomsMegler 1 seier salet er halvert etter pandemien.

– I Hol kommune åleine er det 175 brukte fritidsbustader til sals. Det må vere historisk høgt, og eg har aldri sett så mange, seier Haatuft.

Han trur ikkje marknaden vil ta seg opp før renta er sett ned fleire gonger.

Salet av nye og brukte hytter har også fått seg ein kraftig knekk. I åra før pandemien låg salet ganske jamt rundt 12.000 einingar i året. Så auka det til 16.500 i 2021. I fjor vart det omsett 9.500 fritidsbustader.