Kraftig vekst for Stadt

Stadt As i Gjerdsvika hadde ein solid opptur i fjor med kraftig auke i inntektene og overskott. Det viser rekneskapen som no er offentleg.

Gjerdsvika-bedrifta som utviklar og lagar anlegg og system for bruk av elektrisitet til framdrift av skip, har lagt bak seg tre år med dalande inntekter og underskot.

I fjor gjorde inntektene eit solid hopp frå kring 15 til over 37 millionar kroner. Eit resultat før skatt på nær to millionar er ei solid forbetring frå fjorårets minustall (sjå tabell under).

Ved starten av fjoråret fortalde dagleg leiar og eigar Hallvard Slettevoll at dei var på jakt etter fleire folk og at dei hadde ei ordrereserve på kring 100 millionar.

Innpass i marknaden for militære skip - også internasjonalt – har vore medverkande til veksten. Bedrifta sikra seg i fjor si største forsvarskontrakt for elektrifisering av militære skip til eit Nato-land.

I vinter kunne Stad Naval melde at dei var i full sving med å levere seks fulle semitrailerar med utstyr, som skulle om bord på skip som Saab har under bygging for eit Nato-land. Stor pågang gjer at Stadt-gruppa ekspanderer kraftig, melde bedrifta då.