Mannskap på Sanco-båt testa negativt

Dei resterande 12 av mannskapet om bord på Sanco Atlantic har testa negativt for koronasmitte.

Det melder Herøy kommune på si heimeside.

I tråd med planen skal mannskapet bli testa på nytt fredag og tysdag neste veke, opplyser kommuneoverlegen.

Sjøfolka blei sett i karantene etter at to av mannskapet testa positivt i førre veke.

Sanco Shipping-reiar Ivar Slettvoll fortalde til NETT NO onsdag at situasjonen ikkje får konsekvensar for oppdraga deira. Skipet skal ut i arbeid i september og ligg no til kai ved Herøyterminalen.