Ny krangel om sletting av studielån

(NPK-NTB): Sp-leiar Trygve Slagsvold Vedum reagerer kraftig på at Arbeidarpartiet vil avgrensa ordninga for sletting av studielån til dei som har studiepoeng.

Det betyr at mellom anna hjelpepleiarar og fagarbeidarar fell utanfor.

– Dei kan ikkje i fullt alvor meina at folk som har gått fagskule eller flytta på hybel for å ta yrkesfag ikkje skal få sletta studielån, medan dei som har gått sosiologi eller teke statsvitskap skal få det, seier Vedum til Nettavisen.

I valkampen lova Arbeidarpartiet å føra vidare ordninga som vart foreslått av regjeringa i fjor haust og vedteken i Stortinget i samband med statsbudsjettet for 2025. I forslaget til statsbudsjett for 2026 var dette fjerna, men etter mykje kritikk snudde Arbeidarpartiet tysdag.

Der ordninga tidlegare omfatta all studiegjeld, ønskjer Arbeidarpartiet no å knyta studielånsslettinga til studiepoeng. Det sa finanspolitisk talsperson i Arbeidarpartiet Tuva Moflag på NRKs Debatten tysdag.

Vedum har tidlegare sagt at det er uaktuelt å gå i forhandlingar før sakene om sletting av studiegjeld og vidareføring av ordninga med gratis ferjer var retta opp.

På spørsmål om Arbeidarpartiets forslag om at studielånsslettinga blir knytt til studiepoeng oppfyller kravet for å stilla til forhandlingar, er Vedum krystallklar.

– Nei, sånn som Ap har lagt det fram går det ikkje. Men eg reknar med at Ap sjølvsagt kjem til å utvida ordninga. Dette er Fellesforbundet og Fagforbundets medlemmer. Dei som støyper betong og klipper hår. Dei må sjølvsagt få den same ordninga, seier Sp-leiaren.

(©NPK)