Nytt godt år for familiereiarlag

Det Selje-baserte familiereiarlaget  Hovden Senior hadde eit nytt godt år i fjor, viser rekneskapen. 

Selskapet blir no leia av Ole Theodor Hovden, etter at han selde naprapat-verksemda han hadde bygd opp i nær 20 år. 

Kystfiskebåten Hovden Viking sikra ei omsetning på nær 64 millionar kroner i 2024. Det er på nivå med 2022 og 2023, som er det førebelse rekordåret for reiarlaget (sjå tabell under).

 Lønnsemda er framleis solid, men gjekk eit knepp ned samanlikna med året før. Resultatet før skatt enda på 11,5 millionar. Rekneskapen viser mellom anna at lønnskostnadene er som før, medan varekostnaden auka betydeleg. 

Reiarlaget hadde 15 årsverk i arbeid i fjor. 

Hovden Viking blei bygd på Larsnes Mek Verksted og levert i 2018. Sild, sei, makrell og torsk er dei viktigaste fiskeslaga for reiarlaget.

Etter at det blei teke eit stort utbytte etter 2023-resultata, blir overskotet i år overført til eigenkapitalen. Den er på kring 43 millionar kroner og selskapet hadde ei langsiktig gjeld på 176 millionar. 

Familieselskapet Hovden Holding eig 84 prosent av selskapet, medan Tarald Karlsen på Senja eig 15 prosent. 

Retting: I den første versjonen av denne saka stod det at reiarlaget ikkje hadde langsiktig gjeld. Det stemmer ikkje - og blei retta 14. april klokka 19.35. 

Då blei det samtidig føya til at makrell og torsk er mellom dei viktigaste fiskeslaga for reiarlaget.