Røkke om Noreg-retur: – Det gjer eg aldri

(NPK-NTB): Kjell Inge Røkke kjem aldri til å flytta heim, sa han på veg inn til Oslo tingrett for å vitne i ein av Noregs største næringslivsrettssaker.

To av Noregs rikaste menn – Kjell Inge Røkke og Christian Sveaas – står på kvar si side av rettssaka, som starta tysdag 7. oktober.

På veg inn vart Røkke spurd av Nettavisen om han vurderer å flytta tilbake til Noreg. 67-åringen har budd i Sveits sidan 2022.

– Nei, det gjer eg aldri, svarte Røkke.

Han seier han skal vera i Noreg fram til fredag.

Det er lagt fram mange timar lydopptak av telefonsamtalar i retten, og Røkke blir i fleire av samtalane beskriven som mellom anna ein «svingstong», og «ekstremt manipulerande». Dette er likevel første gong retten høyrer Røkke forklara seg om rolla si i forhandlingane, skriv E24.

Røkke fekk òg spørsmål frå journalistane om kva forventningar han har til dagen.

– Ingen andre enn å fortelja faktum om ein transaksjon me er stolte over at me fekk til, seier milliardæren.

Rettssaka er knytt til refinansieringa av offshorereiarlaget Solstad.

Christian Sveaas’ selskap Kistefos og 46 tidlegare medaksjonærar har saksøkt Kjell Inge Røkkes Aker Capital, Solstad Offshore og Pareto Securities. Dei meiner dei vart grovt forskjellsbehandla under refinansieringa av Solstad i 2023.

Sveaas, som er nest største eigar, meiner Røkke fekk ein urimeleg fordel, noko Røkke avviser.