Sa ja til bompengar på Trollstigen

Eit fleirtal av politikarane i samferdselsutvalet i Møre og Romsdal sa onsdag ja til at det blir nytta bompengar for å sikre Trollstigen. 

Det står att å sjå korleis dette blir organisert og saka gjaldt i denne omgang ei prinsipiell tilslutning til bompengefinansiering av prosjektet.

Fylkespolitikarane bad også vertskommunane Rauma og Fjord seie ja til bruk av bompengar. Frp og Industri- og Næringspartiet sine representantar stemte mot. 

Fylkestinget skal ta endeleg stilling til saka. 

Strekninga på fylkesveg 63 mellom Fjord og Rauma kommune er vinterstengt, men ei svært populær rute for turistar sommarstid. 

I fjor blei vegen stengt på grunn av rasfare og det er behov for omfattande sikring for å opne strekninga for vanleg trafikk. Kostnadane er anslått til 250-300 millionar kroner.

I forslaget ber politikarane om at det blir sett eit øvre tak for passeringar per sesong, med særleg omsyn til arbeidspendlarar.

Les meir om vedtaket (ekstern lenke)