(NPK-NTB-Bibiana Piene) Lønnsoppgjeret i staten er i hamn med eit historisk høgt sentralt lønnstillegg, ifølgje YS og LO. Også Akademikerne stadfestar semje.

– Vi har fått gjennomslag for å løfte heile laget, sikre likelønn og jamne ut forskjellar, seier Egil André Aas, leiar i LO Stat i ei pressemelding.

Alle heiltidstilsette i LOs medlemsforbund i staten er sikra 31.000 kroner i generelt tillegg. Det betyr at lågtlønte i staten får ekstra mykje i år og er sikra auka kjøpekraft.

Ramma er på 5,2 prosent, det same som i frontfaget. Ein liten del av oppgjeret, 15 prosent, går til lokale forhandlingar. Det er mindre enn tidlegare år.

– Store potter til lokal fordeling fører ofte til at nokon får mykje, og andre ingenting. Dette gir ei utvikling vi ikkje ønskjer å halde fram med, seier Aas

YS fornøgd
Også YS Stat-leiar Jens B. Jahren er fornøgd med resultatet.

– Vi er glade for at vi har sikra eit stort generelt tillegg og ei god avsetning til lokale forhandlingar, noko som gir medlemmene våre ein stor lønnsvekst, seier han.

Lønnsforhandlingane vart sluttførte fredag kveld, i god tid før fristen ved midnatt natt til måndag.

Også Akademikerne, den største hovudsamanslutninga i staten, har akseptert avtalen.

– Dette legg til rette for ei god lønnsutvikling for medlemmene våre. Resultatet er viktig for at staten skal halde fram med å vere ein attraktiv arbeidsplass for høgt utdanna, seier leiar for Akademikerne stat, Kari Tønnessen Nordli.

Unio ikkje med
Unio er einaste part som ikkje har akseptert oppgjeret.

– Unio stat er framleis i forhandlingar med staten, heiter det på Unios nettsider fredag kveld.

Kommunal- og distriktsminister Sigbjørn Gjelsvik (Sp) er likevel glad for at mesteparten av oppgjeret er i hamn.

– Eg er veldig glad for vi gjennom ei forhandlingsløysing har vorte samde med Akademikerne, LO Stat og YS Stat om eit lønnsoppgjer innanfor frontfagsramma på 5,2 prosent, seier han.