Slike aviseigarar er blitt meir sjeldne

(NPK-NTB): Færre aviser er heilt uavhengige av dei store aviseigarane. Dei tre store aviskonserna i Noreg kontrollerer no 74,1 prosent av opplaget.

Den samla andelen av opplaget til dei tre største aviskonserna i Noreg, Amedia, Schibsted og Polaris Media, har auka nesten kvart år sidan 2020.

Medietilsynet seier at dei følgjer utviklinga tett vidare framover.

– Vi har så langt ikkje sett noko som tyder på at oppkjøp og samarbeid har som formål å leggja ned sjølvstendige redaksjonelle einingar. Det er derimot viktig at auka konsolidering ikkje fører til at dei redaksjonelle produkta blir for like, seier Mari Velsand i ei pressemelding.

Opplagsandelen til konserna i 2024 var 74,1 prosent, mot 73,1 i 2023. Det var 255 aviser i Noreg i 2024, fem fleire enn året før.

Radiomarknaden i Noreg er stabil, melder Medietilsynet.

NRK har 66 prosent av den daglege lyttinga, P4 22 prosent og Bauer Media nær 12 prosent. Det same gjeld den tradisjonelle TV-marknaden. NRK og TV 2 er klart størst. Når det gjeld bruk av strøymetenester, er TV 2 og NRK TV dei største aktørane saman med Netflix.

(©NPK)