Medvind og vekst for lite mediekonsern

Robin Røkke står bak noko så sjeldan som eit frittståande mediekonsern – og kan vise til vekst og lønnsemd.

Fjorårets rekneskap for avisene viser ei god utvikling, og medieleiaren med kring 20 personar i arbeid har fleire ting å gle seg over.

I skrivande stund er i han i full sving med å starte opp nok ei lokalavis på Nordvestlandet.

Startar opp Aukranytt
Selskapet Aukranytt blei registrert for kort tid sidan, og Røkke stadfestar at dei skal i gong «i løpet av kort tid».

– Vi har gjort avtale om kontor på Aukra, og kjem til å gjere det same der, som vi har gjort i Hustadvika, seier han til Nett No.

Førebels vil han halde korta litt tett til brystet om den komande avisa, men den skal dekke kommunen med same namn - og som til no har vore utan lokalavis.

– Hustadvikingen har vore eit eventyr
Nemnde Hustadvika var også utan lokalavis inntil i fjor sommar. Då starta Tvisyn-konsernet til Røkke opp Hustadvikingen saman med Hilde Kvammen.

– Hustadvikingen har vore eit eventyr å vere med og starte opp. Vi var så heldige at vi fekk Hilde Kvammen som redaktør og medinvestor etter at ho flytta heim, seier han.

I Hustadvikingen er Kvammen med som 50-prosents eigar. Dei øvrige avisene eig Røkke via Tvisyn-konsernet, som blei etablert i 2019. Sjølv er han dagleg leiar og styreleiar i dei fleste avisene.

Sjølv om 2023-rekneskapen viser eit underskot for Hustadvikingen, kan han fortelje at økonomien no er «om lag i balanse». Og frå januar i år innfridde dei også krava til pressestøtte, ifølgje Røkke.

Øyblikk best i klassa
Øyblikk – lokalavisa i Giske - leverte dei beste økonomiske resultata av alle avisene der Røkke har involvert seg.

Inntektene i fjor bikka godt over fire millionar for første gong i fjor. Lønnsemda var også solid, med ein resultatmargin på om lag ti prosent (sjå tabell under).

– Her har vi sunn drift i det som har vore ei godt etablert avis sidan 1980-talet. I tillegg til godt innhald, hadde vi også ei vellukka nylansering av nettavisa i februar 2023, fortel Røkke.

Har innført felles plattform for avisene
Innføring av ein felles nettavisplattform, der avisene kan jobbe i same system på tvers i konsernet, har óg vore eit avgjerande grep.

– For Øyblikk sin del kosta det litt meir enn den gamle nettavisa, men har lønt seg. Slik kan vi jobbe meir systematisk, også er staben i Øyblikk veldig gode på rutinar for publisering. Det gir resultat, legg han til.

Tvisyn-konsernet eig også utgiverselskapa Midsundingen i Molde og Vestnesavisa i Vestnes. I sistnemnte gjekk omsetninga litt ned i fjor, men resultatet snudde frå minus til pluss.

I Midsundingen er det også «sunn og god drift» som gjeld, viser rekneskapen (sjå tabellar under).

– Bygger infrastruktur for demokratiet
I ein alder av 41 år er Robin Røkke allereie ein erfaren avismann. Han starta som journalist i lokalradio som 14-åring og var etterpå innom både fagpresse, rikspresse, regionaviser og lokalmedia.

I dei seinare åra har han gått over til å vere eigar og investor i lokalaviser.

– Det er artig å tene pengar og kunne leve av noko som er verkeleg meiningsfylt. Vi bygger infrastruktur for demokratiet ved å legge til rette for ein opplyst offentleg samtale, seier han.

Aviseigaren sutrar ikkje over rammevilkåra til mediebransjen, og meiner styresmaktene i all hovudsak forstår verdien av ei levedyktig presse.

– Alle avisene vi driver er på plassar der du må ha pressestøtte for å overleve - og det er slik den er meint å verke, seier Røkke.

– I tillegg er det god distriktspolitikk, fordi lokalaviser representerer kompetansearbeidsplassar i område der slike arbeidsplassar ofte er mangelvare, legg han til.

Har utfordringar i Lofoten
Røkke erkjenner at han av og til «saknar si eiga stemme» som journalist, eller redaktør. Men per no har han fleire frontar å jobbe på som eigar.

I tillegg til dei fem avisene på Nordvestlandet, består porteføljen til Tvisyn-konsernet til Røkke også av Malviknytt i Trøndelag, Avisa Lofoten i Vest-Lofoten og avisa Østhavet i Vardø.

Røkke legg ikkje skjul på at Lofoten-avisa har sine utfordringar. Dei redaksjonelt tilsette er oppsagt som følgje av dårleg økonomi, og styret vurderer for tida kva vegen blir vidare.

Også Malviknytt hadde underskot i fjor, men Røkke trur det betalar seg å bygge opp avisa.

– Etter at det har gått ei stund, får vi ta ein fot i bakken og vurdere vegen vidare, seier han.

Redaktør pendlar frå Litauen
Avisa lengst nord, Østhavet, er også ein fersk tilvekst i konsernet.

– Det var ei tradisjonsrik avis som kom under ei uforståeleg konkursbehandling på grunn av ein formalitet med manglande styre i fjor. Vi kjøpte avisa som ein eigedel 21. november i fjor, fortel han.

– Etter at vi sendte ut første avisa den 14. desember til alle tidlegare tingarar, så strøyma det på med abonnentar, legg han til. Også i Vardø ventar han om lag balanse på drifta i 2024. Med seg har dei ein norsk redaktør som pendlar frå Vilnius i Litauen, der familien bur.

– Vi var superheldige med at vi fekk han som redaktør, og avstandsarbeid plar løyse i våre digitale dagar. Han jobbar fast to veker i Vardø, så reiser han to veker til Vilnius – også har vi sjølvsagt skrivande frilansarar til stades lokalt i Vardø i tillegg, fortel han.