Spår bustadprisfall på fem prosent

NPK-NTB: Noregs Bank trur at bustadprisane vil falle med rundt 5 prosent det neste året. Torsdag vart styringsrenta for første gong sett heilt ned til 0 prosent.
I for den historiske renteavgjerda skriv Noregs Bank at den markerte auken i arbeidsløysa saman med uvisse omkring virusutbrotet vil bidra til redusert etterspurnad og lågare prisar i bustadmarknaden den næraste tida.
– Vi anslår at bustadprisane fell med rundt 5 prosent frå mars i år til mars neste år før dei igjen aukar moderat. Utsikter til at også tilbodet av bustader kan gå litt ned, vil truleg bidra til å dempe nedgangen. Etter kvart som uvissa om smittesituasjonen minskar, ventar vi at låge renter og betring i arbeidsmarknaden vil bidra til auke i etterspurnad, skriv Noregs Bank i si pengepolitiske oppdatering for mai.
Salet av nye bustader har falle den siste tida, og Noregs Bank går ut frå at også bustadinvesteringane fell kraftig i år.
Onsdag la Eiendom Norge fram tal som viste at bustadprisane steig med 0,5 prosent nominelt i april, stikk i strid med spådommar om at prisane ville falle. Det er uvisst om Noregs Bank har teke høgd for denne utviklinga i vurderinga si.
Administrerande direktør Carl O. Geving i Norges Eiendomsmeglerforbund meiner at rentenedgangen på torsdag er eit svært tydeleg signal frå Noregs Bank. Han tolkar det slik:
– Nordmenn kan vente historisk låg rentebelastning i mange år. Det kjem godt med i nedgangstider. Derfor bør folk flest springe til banken og krevje lågare rente enn det bankane tilbyr i dag, seier han.