Dei ber Aps landsmøte seie nei til elektrifisering med kraft frå land.

I forkant av Ap-landsmøtet i mai har fleire lokallag spelt inn forslag om å seie nei til å elektrifisere olje- og gassfelt på sokkelen med kraft frå land.

– Noreg manglar kraft for å stimulere til investeringar i grøne industriløysingar og for å fase ut fossil energibruk. Offshore elektrifisering med straum frå land vil redusere kraftoverskotet i Noreg og auke straumprisane, heiter det i eit forslag frå Asker Arbeiderparti.

Dei peikar på at offshoreselskapa allereie har midlar og teknologi til å byggje havvind.

– Derfor må ikkje selskapa få høve til å kople seg til landstraum, for då blir tempoet redusert i industrialiseringa av havvind, påpeikar Asker Ap.

Også Eidsvoll Arbeiderparti fryktar auka straumprisar som følgje av elektrifiseringa.

Lokallaget peikar også på at den gassen som ikkje blir brukt på plattformene, blir eksportert. Dermed blir utsleppa berre flytta frå Nordsjøen til EU-området, meiner dei.

– Miljøgevinsten er null! skriv laget i uttalen sin.

Eidsvoll Ap meiner også at elektrifiseringa vil bety at 10 prosent av Noregs elproduksjon går til sokkelen.

– Eit så stort ekstra forbruk vil automatisk medføre høgare straumprisar, skriv dei.

Også Arendal Arbeiderparti meiner elektrifisering av sokkelen med kraft frå land vil vere «uheldig», medan Vestland Ap tek til orde for at elektrifisering av sokkelen i størst mogleg grad må skje med havvind eller annan fornybar energi produsert på sokkelen.

Ap-laga følgjer dermed delvis i Senterpartiets spor, som på landsmøtet sitt i midten av mars vedtok å seie nei til å elektrifisere gassanlegget Melkøya utanfor Hammerfest med kraft frå land.

Frå sentralt hald i Ap er det likevel liten entusiasme å spore for forslaga.

– Både i gjeldande partiprogram og Hurdalsplattforma peikar regjeringa på elektrifisering av nye og eksisterande felt, samtidig som det skal sikrast tilstrekkeleg fornybar kraft til ny og eksisterande industri på fastlandet, heiter det i ein kommentar frå sentralstyret.

Dei vektlegg også at elektrifisering er avgjerande for å få ned norske klimautslepp.

– Både dagens og tidlegare stortingsfleirtal har tydeleg oppmoda selskapa til å bruke kraft frå land i nye prosjekt og større ombyggingar, heiter det i tilsvaret.