– Det blir mykje støy og lite opplysning

Martin Bech Holte var mellom dei som var på scena under Uredd-konferansen i Ålesund torsdag. 

Etter at den første boka hans  «Landet som ble for rikt», skapte rabalder i det minste i media – har det vore litt mindre støy kring den andre utgivinga «Alternativt statsbudsjett». 

Det siste er han i grunn komfortabel med. 

Holte fortel at han bevisst brukar mindre tid på offentlege diskusjonar i media enn før, fordi han meiner debattane ofte blir for konfliktorienterte.

– Avisene søkjer konflikt og overskrifter. Det blir mykje støy og lite opplysning. Eg opplever at eg får meir ut av å møte folk ansikt til ansikt, enten det er byråkratar, politikarar eller ungdom, seier han til Nett No. 

– Mange forstår at vi står i store utfordringar
Kort sagt peiker forfattaren på at Norge har store utfordringar med pengebruken og må skifte kurs for å sikre framtidig verdiskaping. 

– Grunnleggjande sett opplever eg at dei økonomiske fagmiljøa er ganske einige i mykje av det eg peikar på, seier han vidare. 

Han meiner mykje av debatten etter bokutgivinga hans har handla om talgrunnlag og detaljar, medan løysingane har fått mindre merksemd.

– Det er alltid nokon som har behov for å seie at alt er bra som det er. Men mange forstår at vi står i store utfordringar, seier han.

– Når du får store pengestraumar utan tydeleg ansvar, aukar risikoen for feilprioriteringar og kameraderi. Det er ein fare for eit land som Noreg, legg han til. 

Opplever politisk vilje til endring
Holte opplever at fleire politiske parti no signaliserer vilje til endringar.

– Partia på høgresida tør i større grad å seie at formuesskatten slik vi har han i dag, står i vegen for investeringar. Skal vi få nye bedrifter og nye arbeidsplassar, kan ikkje formuesskatten fungere slik han gjer no, seier han.

Samtidig meiner han også Arbeidarpartiet har blitt tydelegare på behovet for å rydde i reguleringar.

– Reguleringar står i vegen for mange næringar, frå bustadbygging til kommunal verksemd. Det er teikn til at fleire ser at vi må gi meir rom for aktivitet, seier Holte.

Teknologi endrar arbeidslivet
Holte har dei siste månadene reist rundt og halde foredrag og samtalar med studentar og unge arbeidstakarar. Han meiner møta med ungdom gir eit tydeleg bilde av kva som kjem.

– Eg snakka nyleg med studentar i eigedomsmeklarstudiet som hadde teke i bruk ny programvare som automatiserer store delar av dokumentarbeidet. Dei innsåg sjølve at det kunne bety langt færre jobbar i framtida, fortel han.

Han meiner det illustrerer kor raskt arbeidslivet er i endring.

– Når teknologi tek over oppgåver, blir det endå viktigare at vi har eit næringsliv som skaper nye moglegheiter. Då kan vi ikkje vere avhengige av at dei same jobbane skal vere der i all framtid, seier Holte.

Jobbar med nytt prosjekt
No jobbar forfattaren med eit nytt bokprosjekt, men vil førebels ikkje seie mykje om innhaldet.

– Det er i startfasen, og eg vil bruke hausten til å arbeide meir konsentrert. Det handlar om dei same problemstillingane, men frå ein litt annan vinkel, seier han.

Holte håpar det neste prosjektet kan bidra til vidare debatt om korleis Noreg skal sikre framtidig verdiskaping.

– Det må bli bra, elles er det ikkje verdt det, seier han.