Arctic Bioscience: – Dette er spennande data

Arctic Bioscience presenterer onsdag ny celleforsking på ein kongress i Amsterdam som viser effektar frå eit middel basert på silderogn.

Dei viser effektar hos immunceller og hudceller som samsvarar med at middelet deira har ein anti-psoriatisk verknad, ifølgje ei børsmelding.

Jobbar med legemiddel mot psoriasis
Bioteknologiselskapet med base i Ørsta jobbar med å utvikle og få godkjent eit legemiddel mot hudsjukdomen psoriasis.

– Dette er spennande data som viser at HR0350 (legemiddelkandidaten, journ. anm.) kan påverke celluære signalvegar som er relevante for psoriasis i både menneskelege immunceller og psoriasis hudcellemodellar, uttaler medisinsk direktør Runhild Gammelsæter i Arctic Bioscience i meldinga.

Resultata er med andre ord lovande for at selskapet sitt middelet fungerer slik dei håpte på.

Har gjort stor internasjonal studie
Eit steg på vegen mot ei eventuell godkjenning som legemiddel, er ein stor studie på pasientar i fem europeiske land. Det er venta at resultata frå denne blir lagt fram i løpet av kort tid .

Middelet mot psoriasis er basert på silderogn, og har tidlegare vore gjennom ein mindre test på pasientar i Noreg, med gode resultat.