Ventar snarleg svar på legemiddelstudie

Arctic Bioscience i Ørsta har utvikla eit middel mot hudsjukdomen psoriasis, som selskapet arbeider for å få godkjent som legemiddel.

Eit steg på vegen mot ei eventuell godkjenning er ein stor studie av middelet på pasientar i fem europeiske land. Den omfattar 521 pasientar og starta i januar i år. No lakkar studien mot slutten, og Arctic Bioscence varslar at selskapet reknar med å kunne byrje å offentlegjere resultata om ein månads tid.

«I januar 2024 ble rekrutteringen til den kliniske HeROPA-studien vellykket ferdigrekruttert med inkludering av totalt 521 pasienter. Siden da har studien forløpt etter planen i alle de fem europeiske landene hvor studien gjennomføres. Når alle pasientene har fullført sitt besøk i studieuke 26 vil dataene bli gjenstand for rensing og analyser. Resultater på primærendepunkt vil bli annonsert deretter, med utlesning av primærendepunkt forventet i slutten av september/tidlig oktober».

Det skriv selskapet i ei børsmelding i samband med offentleggjering av halvårsrekneskapen.

Sjå resultatpresentasjon direkte frå klokka 11:00 (ekstern lenke)

Gode resultat
Middelet mot psoriasis er basert på silderogn, og har tidlegare vore gjennom ein mindre test på pasientar i Noreg, med gode resultat.

Vegen fram mot legemiddelgodkjenning er likevel lang. Eit vellukka resultat frå studien som pågår no vil vere eit langt steg mot målet for Arctic Bioscience, men middelet må gjennom ytterlegare ein studie før ei eventuell godkjenning kjem.

Helsekost
Arctic Bioscience starta opphavleg som ein helsekostprodusent, og det er den marknaden som per i dag gir selskapet inntekter.

I første halvår fall inntektene samanlikna med første halvår i fjor, men selskapet skriv i halvårsrapporten at det ligg an til å nå like høge inntekter på årsbasis i år som i fjor (sjå tabell under).

Opptur etter nedtur
For utviklinga i aksjekursen er det utfallet av legemiddelstudien som er det aller viktigaste fordi eit positivt utfall kan opne vegen inn i ein stor og potensiell meir lønsam marknad enn helsekostmarknaden.

Arctic Bioscience vart børsnotert i februar 2021, med mange investorar på Sunnmøre på eigarsida. Då var kursen 28,50 kroner aksjen, og steig i løpet av ein månads tid til rekordnoteringa 30 kroner.

Deretter fall kursen jamt nedover, til botnnoteringa 7,82 kroner aksjen i oktober 2023.

I år har kursen svinga rundt 10 kroner aksjen fram til utgangen av juli. Før aksjehandelen opnar i dag er kursen 14,40 kroner aksjen. Det verdset selskapet til 365 millioner kroner og er ein kursauke på 38 prosent sidan 31. juli i år.

Mindre i kassa
Legemiddelutvikling kostar og det gjer at det minkar i kassa for selskapet.

Tilgjengleg likviditet utgjer 49,8 millioner kroner ved utløpet av første halvår, medrekna ein rett til å låne 30 millionar kroner. Ved utløpet av 2023 var tilgjelgleg likviditet 109,6 millionar kroner.

Arctic Bioscience vurderer fleire alternativ for å sikre at selskapet har nok pengar:

«Likviditetssituasjonen følges tett. Ulike finansieringsalternativer vil bli vurdert for å sikre fremtidig finansiering av selskapets aktiviteter etter utlesningen av primærendepunktet. I tillegg vil prosessen med å forfølge potensielle kommersielle partnerskap for HRO350, som en del av finansiering av en fremtidig fase III, fortsette», skriv selskapet i børsmeldinga.