Snakka varmt om norsk fregattbygging

Over 70 nye fregattar. Det er summen av konkrete og anslåtte fregattar i byggeprogramma til dei norske Nato-allierte som var på scena ved Verftskonferansen i Ålesund i dag, tysdag. 

Alle fire landa presenterte seg og vil gjerne bli partnar i det norske byggeprogrammet på fem nye fregattar. 

Det er fartøy som den norske regjeringa seier skal byggast i eit langsiktig strategisk samarbeid med ein nær alliert. Det betyr at regjeringa ikkje har eit krav om at fregattane skal byggast i Noreg.

Fornuftig militært
Viseadmiral Richard Hunt, som no er president for Vard-eigar Fincantieri sitt amerikanske skipsbyggingsselskap, Fincantieri Marinette Marine, seier dei kan bygge fregattar for Noreg - i Noreg.

– Vi kan absolutt gjere det, seier han. 

Fincantieri har allereie ein avtale om å bygge fregattar for USA, og vil overbevise Noreg om å bygge same type fregatt. 

Hunt argumenter med at det også er militært fornuftig å bygge fregattar ved norske verft. Det vil bidra til å bygge opp ein reparasjon- og vedlikhaldskapasitet i Noreg, som vil vere ein fordel for amerikanske fregattar

På lang sikt anslår Hunt at USA vil bygge 50 fregattar til si eiga marine i løpet av 20 år. 

Norske kontraktar
Når Noreg skal avgjere kven som får bygge dei nye norske fregattane, er eventuelle oppdrag for norske utstyrs- og våpenleverandørar ein faktor. 

Grunnen er mellom anna at kven som får bygge, kan opne ein marknad for norske bedrifter inn i andre land sine fregattbyggeprogram.

I eit slik perspektiv ruvar Hunt sitt anslag om 50 amerikanske fregattar størst, men også Frankrike, Tyskland og Storbritannia lokkar med sine fregattprogram - og vil gjerne har Noreg inn i dei.

Norske styresmakter og industri vart fridd til frå dei andre store allierte frå scena på Verftskonferansen. 

• Tyskland har planar og fem-seks nye fregattar (avhengig av endeleg politisk godkjenning, red. anm.). 
• Frankrike har eit pågåande byggeprogram på åtte fregattar, tre av dei for Hellas. 
• Storbritannia har eit pågåande byggeprogram på 13 fregattar.