Børsdagen: Nordvestlandet største går av børs

Går alt som britiskbaserte Apak Fund håpar, kjem over 90 prosent av aksjonærane i Norva24 til å takke ja til bodet på 36,50 svenske kroner per aksje innan fritsten går ut i starten av mai i år.

Bodet verdset selskapet til om lag sju milliardar norske kroner.

Planen er å at ta selskapet av børs etter oppkjøpet. 

Norva24 si hovudkontoradresse er i Stryn - der også fleire større aksjonærar bur og arbeider.  Per i dag er Norva24 det mest verdifulle selskapet på Nett No si oversikt over børnoterte selskap på Nordvestlandet. 

På plassane bak kjem Hexagon Composites - som er verdset til 5,1 milliardar kroner, og Sparebanken Møre -som er verdset til 4,9 milliardar kroner.

Fleire har sagt adjø til børsen
I åra 2020-2021 fekk Nordvestlandet fleire nye selskap på børsen: 

Hexagon Purus (2020), Salmon Evolution (2020), Romsdal Sparebank (2020), Nortel (2020) Havila Kystruten (2021), Norva 24 (2021), Statt Torsk (2021), Arctic Bioscience (2021) og Hav Group (2021).

Ingen selskap på Nordvestlandet er børsnotert etter 2021, men fleire har gått den andre vegen.

Vi skal ikkje så mange år attende før både skipsbyggingskonsernet Vard, møbelprodusenten Ekornes og Fjord1 var børsnoterte selskap - Vard i Singapore, Ekornes og Fjord1 i Oslo.

I løpet av 2023 blei mobiltelefoniselskapet Nortel i Ålesund kjøpt opp og tatt av børs. Statt Torsk slo seg saman med Vesterålen Havbruk og forlet børsen.

Eqva - tidlegare Havyard - flytta hovudkontoret frå Fosnavåg til Kvinnherad. 

All verksemda til selskapet er no i Sunnhordland og Bergen-området, og tyrkiske Tersan er nye eigarar av skipsverftet i Leirvik.

Eqva er framleis børsnotert, men utan tilknytning til Nordvestlandet.

Fleirtalet har takka ja til bod
Eigarane av 57 prosent av aksjane i Norva24 har allereie takka ja til bodet. Sjansen er dermed stor for at Apak Fund kjem i mål og at tida som børsnoterte selskap snart er over.

Norva24 spring delvis ut av industrimiljøet i Stryn og selskapet Septik24. 

Gjennom oppkjøp og samanslåingar har selskapet bygd seg opp til eit internasjonalt konsern, med Noreg, Sverige,  Danmark og Tyskland som hovudmarknadar. 

I fjor hadde selskapet over 2000 tilsette, 3,6 milliardar kroner i inntekt og eit resultat før skatt på 246 millionar kroner. 

Stryningar får tresifra antal millionar 
Om salet går i boks vil det gi betydelege beløo til fleire lokale eigarar. 

Stryn-selskapa Invest 24 og AHB Invest eig høvesvis 12.519.326 (6,9 prosent) og 1.829.095 (ein prosent)) aksjar i Norva24. 

Det betyr at eigarane i Invest 24 vil få omlag 490 millionar norske kroner, medan eigarane i AHB Invest får 71 millionar norske kroner, 

Invest 24 har tre eigarar som eig kvar sin tredjepart; selskapa AHB Invest, Isco og JKT Birkeland Invest. Dei to første har adresse i Stryn. 

AHB Invest er eigd av Arild Bødal og familie, Isco av Ivar Loen Sandbakk, Jan Erik Sandbakk, Malvin Ivar Sandbakk og Kristian Sandbakk. 

Artikkelen er oppdater med aksjekursar for børsnoterte selskap på Nordvestlandet, etter at børsen stengte for dagen.