Bauta Group årets bedrift

Vestnes-selskapet Bauta Group er kåra til årets bedrift av Møre og Romsdal fylkeskommune.

I 2018 var selskapet omorgansiert til eit konsern med 18 selskap og over 600 tilsette, som leverer stål og stålkonstruksjonar til skipsindustrien, og også driv med havbruk, eigedomsutvikling, utleige av maskiner og elektrotenester.

– Det er veldig, veldig mange dyktige tilsette som har lagt grunnlag for det vi har fått til over mange år. Prisen gir fornya motivasjon. Eg vart både stolt og rørt då eg vart oppringt onsdag morgon og fortalt at vi får prisen, seier dagleg leiar Daniel Sundet i ei pressemelding.

Bauta Group vart nominert til prisen av Vestnes Næringsforum for si merksemd på berekraft og som ein populær arbeidsplass blant unge.

Nye satsingar
Selskapet har 30 verft på kundelista, og har dei siste åra utvida kva konsernet satsar på.

I 2022 etablerte Bautao Group datterselskapet Bauta Aquaculture for å satse på bygging av lukka oppdrettsmerdar.

I fjor starta Bauta Group oppbygging av  mottak og bearbeiding av stål og aluminium i den tidlegare Leca-fabrikken på Skorgeneset i Vestnes kommune.

Etablert i 2009
Bauta Group AS vart etablert i 2009 av John Arve Sundet og er i dag leia av Daniel Sundet.. 

Dei to er medeigarar saman med Malin Holm Sundet og June Holm.

Årets bedrift tidlegare år

• 2023: Hotel Union Geiranger
• 2022: MMC Frist Process, Herøy kommune
• 2021: Nansen Polar Expeditions, Smøla kommune
• 2020: Norsol AS, Tingvoll kommune
• 2019: Aas Mek. Verksted AS, Vestnes kommune
• 2018: Pipelife Norge, Surnadal kommune
• 2017: Volda Maskin AS, Volda kommune
• 2016: Tingvollost AS, Tingvoll kommune
• 2015: Slettvoll Møbler AS, Stranda kommune
• 2014: Ulmatec Pyro AS, Haram kommune
• 2013: Rindalslist AS, Rindal kommune
• 2012: Kleven Maritime AS, Ulstein kommune
• 2011: Arvid Gjerde AS, Rauma kommune
• 2010: Gjøco AS, Gjemnes kommune
• 2009: Saferoad AS, Ørsta kommune
• 2008: Odim AS, Hareid kommune
• 2007: Brunvoll AS, Molde kommune
• 2006: Haugen Bok AS, Volda kommune
• 2005: GC Rieber Oils AS, Kristiansund kommune
• 2004: Hydro Aluminium Sunndal AS, Sunndal kommune
• 2003: Hustad Marmor AS, Fræna kommune
• 2002: Berg Jacobsen Gruppen AS, Molde kommune
• 2001: I.P. Huse AS, Sandøy kommune