Bauta har dobla omsetninga på to år

Oppdrag for ein rekke nye skipsverft har gitt kraftig auke for Bauta-konsernet i Vestnes dei siste åra.

Rekneskapen for 2023 viste at veksten heldt fram i fjor med ei auke i inntektene på 100 millionar. Fasit etter fjoråret vart ei omsetning på 427 millionar. Det er om lag ei dobling frå 2022.

Inntektsauken i fjor kom frå auke i aktivitet hos eksisterande kundar, ifølgje årsmeldinga.

Samtidig sank lønnsemda med eit resultat før skatt kring éin halvannan million svakare enn året før (sjå tabell under).

Tap på Fosen-konkurs
Årsaka til at resultatet ikkje følgde inntektene oppover, var tap på fordringar knytt til konkursen ved Fosen Yard i fjor, skriv styret i årsmeldinga.

I rekneskapen til dotterselskapet Bauta Maritime er det bokført eit forventa tap på kring 6,75 millionar kroner på fordringar.

Vestnes-konsernet med hovudkontor i Tomrefjord har på berre kring ti år, bygd seg opp til storleiken dei har i dag. Tidlegare heitte konsernet MCP, før dei la om profilen til Bauta Group i 2022.

Også arbeidsstokken har vekse. Berre frå 2022 til 2023, auka konsernet frå 422 til 473 årsverk i arbeid.

Gjer oppdrag for fleire enn 20 verft
Etter etableringa av Bauta Metal og Bauta Processing i år, består konsernet av 18 selskap. Dei driv med alt frå stålarbeid, sveis, elektro, eigedom, bygg og akvakultur.

Meir enn halvparten av konserninntektene i fjor kom frå Bauta Maritime, som i hovudsak utfører stål- og platearbeid ved utrustning av skip for verftsindustrien.

Konsernet har i dag fleire enn 20 verft mellom sine kundar, som gjer dei mindre sårbare for svingingar hos enkeltkundar.

Trass skjerpa konkurranse, ser dei positivt på framtida, og er klare til å gjere nye investeringar for å redusere risiko og auke gevinsten ved vidare vekst, skriv styret i årsmeldinga.

Trur på fleire ombyggingar
Storeigar John Arve Sundet har vore med å bygge opp konsernet, og er i dag styreleiar i dei ulike selskapa. Då Nett No møte Sundet tidlegare i år, fortalde han at veksten har kome raskare enn han hadde rekna med.

Samtidig hadde han trua på at det vil komme fleire oppdrag i den maritime industrien framover.

– Eg trur det vil kome fleire ombyggingar, ikkje minst fordi det er ein offshoreflåte som er tilgjengeleg. Det gjer at ein kan kome raskt i gong med produksjonen, fortalde han.

Vindkraftmarknaden er også interessant, men Sundet-meiner det trengst sterkare insentiv frå styresmaktene før det losnar i denne marknaden.