Best på kunderservice - for tredje gong

Tussa vann også kundeserviceprisen i 2017 og i 2019, opplyser selskapet på si eiga heimeside.
Kundeserviceprisen er ein årleg test av kundesentra i Noreg, utført av selskapet SeeYou. Undersøkinga «Best i test» går føre seg frå november til april.
Tussa kundesenter har blitt kontakta av 25 ulike "mystery shoppers" gjennom kommunikasjonskanalane telefon, chat og e-post.

- Utruleg stolte

På grunn av koronautbrotet er sjølve konferansen med premieutdeling utsett til hausten, men kåringa av alle kategorivinnarane vart gjennomført digitalt 7. mai.
- Dette er kjekt! Vi er utruleg stolte av dei dyktige energirådgjevarane våre. Det handlar om å ha kunden som førsteprioritet.
- Kulturen vår og medarbeidarane våre kan ingen kopiere, og det er det som skil oss frå konkurrentane våre over tid. Vi har tilsette som brenn for jobben og som strekkjer seg litt lengre for å hjelpe kundane. Målet vårt er nettopp å ha Noreg sine mest fornøgde energikundar, seier Lise Ulstein, marknadssjef i Tussa-24.

Satsingsområde

Tussa opplyser at kundeservice har vore eit prioritert satsingsområde for bedrifta i fleire år.
- Denne prisen gir oss inspirasjon til å stå på vidare og skape enda betre kundeopplevingar, seier Ulstein.I tillegg til å vinne energiklassen kom Tussa på ein god 2. plass totalt på tvers av alle 23 bransjane, i konkurranse med 181 andre selskap. Totalvinnar av alle bransjane vart Ice Mobil med 92,1 poeng. Tussa kom hakk i hel med 89,1 poeng.
Ifølgje undersøkinga vinn Tussa Kundeserviceprisen 2020 fordi kunderådgjevarane leverer på eit høgt nivå innan alle kommunikasjonskanalane, har høg fagkompetanse, gode behovsanalysar, viser ekte interesse og glede i samtalane og har god kontroll på tilbod og oppfølging.