Blir ny toppsjef i Hofseth-konsernet

Olav Holst-Dyrnes blir ny administrerande direktør i Hofseth International, ifølgje ei melding frå selskapet.

Det er venta at han startar i stillinga i løpet av tredje kvartal i år. 

– Eg har kjent Olav ei stund, og vi har hatt mange gode diskusjonar over ein lang periode før vi kom fram til denne avgjerda. Eg er derfor veldig glad for at han har sagt ja til å bli med i Hofseth, og eg er sikker på at han er den rette personen til å leia selskapet framover, uttaler storeigar og styreleiar Roger Hofseth i meldinga. 

Tidlegare sjef for Ekornes og Havfisk
Olav Holst-Dyrnes har omfattande erfaring frå sjømatindustrien og har hatt leiande posisjonar i ein rekke selskap. Han har også vore toppsjef for selskap som Havfisk (i dag Lerøy Havfisk) og Ekornes. 

Dyrnes er begeistra over moglegheita som baud seg med jobben. 

– Hofseth har ein verkeleg unik ressursbase i Ålesund-regionen på Vestlandet som framleis kan dra nytte av store stordriftsfordelar i dei kommande åra. Det er sjeldan å ha høve til å utvikla eit selskap som omfamnar sirkulærøkonomi og ny matteknologi for å eliminere matsvinn og optimalisere heile verdikjeda for sjømat, uttaler han. 

Hofseth vil jobbe meir med utvikling
Roger Hofseth har til no vore toppsjef i konsernet, saman med fleire andre roller. 

Hofseth fortel at tilsettinga gjer at han kan nytte meir tid på utviklinga av selskapet som kommersiell direktør (CCO), mellom anna ved å vidareutvikle Icefresh-satsinga.

Nett No fortalde nyleg om konsernet sine planar om å doble seg på oppdrett ved å ta i bruk nye metodar i lakseproduksjonen.

Årsmeldinga for 2025 viste lågare inntekter og eit betydeleg underskot for Hofseth International i fjor. Samtidig har dei planar om å hente meir kapital.