Børsdagen: Kurskollaps for Kystruten

Havila Kystruten-aksjen stupte med nær 50 prosent på Oslo børs, til rett under ei krone aksjen tidleg fredag.

Kursen fredag slutta på 0,99 kroner etter eit fall på 50,10 prosent. Dagen i forvegen endte kursen på 1,98 kroner, etter å ha vore over to kroner i løpet av dagen.

Kurskollapsen skjer etter at reiarlaget har hatt ei veke med nær dobling av kursen i kjølvatnet av to rundar med retta emisjon.

Sitt att med ti prosent eigarskap
Tidleg fredag meldte reiarlaget at kapitalforhøyinga var registrert. Aksjekapitalen består no av drygt 833 millionar aksjar, etter at det vart teikna kring 758 millionar nye aksjar til ei krone, ifølgje børsmeldingane.

Med andre ord sitt dei tidlegare aksjonærane att med mindre enn ti prosent av eigarskapen.

Alt klart for å hente heim skipa
Kapitalinnhentinga til Havila Kystruten er eit ledd i å få på plass ei ny finansiering for skipa til reiarlaget, som hamna i trøbbel som følgje av Russland-sanksjonane. I tillegg til emisjonane som er gjennomført, vurderer reiarlaget ein reparasjonsemisjon. Grepet som tilfører kring ein milliard i kapital, inkluderer også eit lån til selskapet.

Etter at pengane er på plass ligg alt til rette for at reiarlaget kan ta dei to siste skipa sine heim. Havila Polaris og Havila Pollux har vore fast hos det tyrkiske verftet Tersan, og skal etter planen segle frå Bergen 12. og 17. august.

Kommunikasjon- og marknadsdirektør Lasse Vangstein i Havila Kystruten fortalde NETT NO i førre veke korleis det blei jobba med å få logistikken på plass for å rekke seglasane.

Hexagon Purus hadde også ein dårleg dag på børsen og fall til under 20 kroner aksjen på lågt volum.

Ingen andre av selskapa frå Nordvestlandet utmerka seg på vinnar- eller taparlista fredag.

Hovudindeksen på Oslo børs falt med 0,42 prosent til 1.234,57.

Børstabell for Nordvestlandet: