Børsdagen: Statt Torsk fann slakteløysing

Hovudindeksen på Oslo børs enda markant ned tysdag med 2,23 prosent. Oljeprisen drog med seg fleire aksjar mot botnen med ein nedgang på meir enn fem prosent for eit fat nordsjøolje kring stengetid.

Sjå kursutvikling for selskapa frå Nordvestlandet under

Kort tid etter stengetid kunne Statt Torsk melde at dei har inngått ein langsiktig avtale om slakting av fisk frå anlegga deira.

Det er Western Seaproduct As på Vartdal som skal slakte oppptil 3500 tonn årleg. Selskapet er eigd av Måsøval-konsernet.

– Vi er ekstremt nøgd med å inngå denne avtalen. Denne er ein hjørnestein i målet vårt om å kontrollere heile verdikjeda av produksjonen vår, seier Statt Torsk-sjef Gustave Brun-Lie i meldinga.

Førre partnar gjekk konkurs
Torskeoppdrettsselskapet fekk problem etter at den førre samarbeidspartnaren Per Stave As gjekk konkurs. Det førte til at dei måtte snu seg raskt rundt for å få på plass ein ny avtale.

Slaktinga av den første torsken på Vartdal er venta å skje i september.

Førre veke fekk Statt Torsk sikra finansiering for å få sett meir fisk i sjøen.

På børsen har kursen gått feil veg for selskapet med eit fall på kring 30 prosent sidan børsnoteringa i fjor vår.

Tysdag enda aksjekursen til Statt Torsk opp med 1,03 prosent og enda på 1,97 kroner.

Havila Shipping og Arctic Bioscience var dagens vinnarar av selskapa frå Nordvestlandet med oppgang på høvesvis 5,46 og 5 prosent.

Golden Energy Offshore var dagens tapar frå regionen og følgde oljeprisen nedover. Aksjekursen til Ålesund-reiarlaget fall med 6,53 prosent.

Kursutvikling for selskapa frå Nordvestlandet: