– Det er mange spennande selskap i regionen

Måndag blei det kjent at 160 Kongsberg-tilsette får nye eigarar – som skal vidareføre verksemda i eit nytt selskap, Neuver Maritime.

Salet inkluderer nær 100 tilsette som jobbar i styremaskin- og rorverksemda til Kongsberg i Brattvåg og Ålesund.

Ser fleire vekstkandidatar i regionen
Partnarane Per-Ola Baalerud og Trond Bjørnøy i Norvestor er måndag på Sunnmøre for å møte tilsette. Nett No fekk ein prat med dei før dei kom til Brattvåg.

– Vi har investert i denne regionen før, mellom anna i Sperre Air Power, og følgjer med på kva som skjer, seier Bjørnøy.

Duoen meiner verksemda er eit spennande utgangspunkt å bygge vidare på. Den nye sjefen har allereie varsla i eit Nett No-intervju at selskapet vil søke etter fleire tilsette.

Baalerud svarar eit tydeleg «ja» på at det er fleire interessante bedrifter på Nordvestlandet som kan vere aktuelle å sjå nærare på – og eit like tydeleg «nei» til å peike på kven dei er.

– Det er mange spennande selskap i regionen med gode føresetnader til å vekse, legg Bjørnøy til.

Samtidig påpeiker han at dei no har merksemda retta mot å bygge det nye selskapet.

I hovudsak utanlandske investorar
Norvestor er eit private equity-fond som samla forvaltar meir enn 60 milliardar.

Oppkjøpet gjerast via fondet Norvestor 9, som i hovudsak har utanlandske investorar, som mellom anna pensjonsfond, ifølgje duoen.

– Det er eit fond på halvannan milliard euro som skal gjere 13-14 investeringar, og hittil har gjort fem, fortel Bjørnøy.

– Fleire bedrifter ser verdien av livslange forhold
Eit interessant produktområde, med lang historikk og godt etablert global posisjon er mellom årsakene til at dei fann Kongsberg-verksemda verdt å satse på.

Posisjonen på service og ettermarknad er ei anna viktig årsak. Opp gjennom åra er det levert utstyrt til kring 14.000 skip. Mange av desse skal til eksempel ha vedlikehald i lang tid framover.

– Fleire bedrifter ser verdien av livslange forhold med kundar, der det er meir kontinuerleg kontakt mellom dei som brukar utstyret, og dei som lagar det, seier Per-Ola Baalerud.

– Kva utstyret kostar er viktig, men det er viktigare at ein er trygg på at utstyret fungere til ein kvar tid, legg Baalerud til og påpeiker at nedetid er dyrt.

Han fortel at dei tilsette i utgangspunkt skal halde fram å jobbe der dei er i dag, og at det nye selskapet vil inngå leigeavtaler med Kongsberg om lokalar.

Tidsperspektivet avhenger av fleire forhold
Norvestor er som nemnt inne på eigarsida i Sperre Air Power. Dei har også investert i fiskeutstyrsleverandørane Cflow i Sula.

Det ligg i forretningsmodellen til fondsinvestorane, at dei på eit eller anna tidspunkt skal ut av verksemdene. Men tidsperspektivet avhenger av ein rekke forhold – ikkje minst utviklinga i selskapet, påpeiker duoen.

– Nokre gonger kan selskap óg ha betre nytte av ei anna type eigarar, seier Bjørnøy.

– I eksempelet med Sperre Air Power har vi vore inne i sju år, og har ikkje tenkt til å selje med det første, legg han til.