Dårleg børsår på Nordvestlandet

I morgon, torsdag 26. oktober, startar Sparebanken Møre resultatsesongen for 3. kvartal for dei børsnoterte selskapa på Nordvestlandet.

Banken er som regel først ute med å rapportere kvartalstal.

I løpet av dagen skal administrerande direktør Trond Lars Nydal møte analytikarar, investorar, presse og andre interesserte i Oslo, ein time etter at børsmeldinga med kvartalsrapporten blir sendt ut klokka sju.

Treffe folk
– Det handlar om nettverk, å treffe folk, at dei skal bli kjent med oss, seier Nydal om poenget med å halde ein fysisk presentasjon, i staden for å berre sende ut ein kvartalsrapport.

Spesielt 2021 blei eit bra år for banken, som brukar summen av kursutvikling og utbetalt utbytte for å måle seg mot andre bankar.

I år er banken blant selskapa med minus som forteikn framfor kursutviklinga hittil i år (sjå tabell under).

- Det er vi sjølvsagt ikkje fornøgd med. I år heng vi etter og vi jobbar med å snu det, seier Nydal.

(saka held fram under)

Tidlegare resultater for børsselskapa frå nordvest:

Fire i pluss
Ved utløpet av 2022 var det fire av dei børsnoterte selskapa på Nordvestlandet som hadde hatt kurstigning, med offshorereiarlaga Havila Shipping (+ 199 prosent) og Golden Energy Offshore Services (+ 68 prosent) i spissen.

Etter at selskapa på Nordvestlandet var ferdig med å legge fram 1. kvartalstala sine i år, i juni, hadde seks av dei ei positiv kursutvikling sidan starten av 2023.

Etter at 2. kvartalstala var klare i september hadde fem selskap hatt ei positiv kursutvikling. Eitt av desse var mobiltelefonselskapet Nortel, som like etter blei tatt av børs etter å ha blitt kjøpt opp.

Før børsen opnar onsdag har fire selskap hatt ei positiv kurutvikling så langt i år; Hexagon Composites, Aretec Aqua-eigar Endúr, Hav Group og Golden Energy Offshore Services.