Ferdig med nedbemanning

- Vi har rigga organisasjonen til det antal årsverk vi skal ha og fått den rette kompetansen, seier administrerande direktør Stig Brautaset i Sparebank 1 Søre Sunnmøre.
Han tok til i jobben hausten 2016.
Banken har betalt ut tilsaman 10 millionar kroner i sluttpakkar i 2017 og 2018. Den reduserte bemanninga vil gi full effekt i resultat i løpet av 2019.

Vekst og optimisme

Brautaset seier nedbemanninga er gjort for å redusere kostnadane for å skape grunnlag for å skape ny vekst.
I fjor auka utlåna til private med 6,8 prosent, utlåna til bedrifter med 14,6 prosent. Utlåna til bedrifter auka første og fremst i andre halvår i fjor. Fordelinga mellom utlåna til private og næringslivet er 84 prosent til private og 16 prosent til bedrifter.
Med unntak for varehandelen ser Brautaset positivt på utviklinga i næringslivet på Nordvestlandet.

Banken ventar ein vekst i utlåna til næringslivet på 15 prosent i år. Prognosen for lån til privatpersonar er 7,5 prosent.

Pengar til Hødd

I dag tidleg signerte Brautaset ein avtale om å gi 1,25 millionar kroner i støtte til Hødd for å få lagt nytt kunstgrasdekke på ei treningsbane.
Pengane kjem frå gåvefondet til banken, som i år får tilført 10 millionar kroner.
Pengane til gåvefondet er ein andel av overskotet. I løpet av to år er avsetningane til gåvefondet dobla, og Brautaset seier planen er ytterlegare auke i innbetalingane til fondet.

Seks millionar til investorane

I 2017 fekk banken for første gang investorar med på eigarsida.

Grunnfondsbeviseigarane gjekk inn med 100 millionar kroner og eig 11,7 prosent av banken. Banken foreslår at dei skal få seks millionar kroner i utbytte etter 2017.