Fire gangar større med laks

I tillegg til å ta i mot og bearbeide torsk og andre kvitfiskslag starta Ole Sande og Gjermund Bringsvor sitt selskap Finefish også med lakseslakteri i fjor haust, og produksjon av laksefiletar i sommar.

Det har gitt selskapet ein kraftig vekst.

Per i dag ligg Finefish an til fire gangar høgare driftsinntekt enn i fjor, seier Ole Sande. I 2023 hadde selskapet 225 millionar kroner i driftsinntekt, opp frå 196 millionar kroner året før. Resultatet før skatt blei 4,5 millionar kroner.

Sande-selskapet har omlag 40 tilsette, dei fleste på Sandsøya der produksjonsanlegget ligg.

Leiarskifte
No tek Sivert Sande (innfelt på biletet) over som dagleg leiar. Han tek over etter Ole Sande, som går inn i rolla som marknadsdirektør, fortel selskapet i ei pressemelding.

Ole Sande seier til Nett No at den kraftige veksten gjer at selskapet også treng å styrke seg i administrasjonen, og i tillegg er leiarskiftet ein del av førebuingane til eit framtidig generasjonsskifte. (Sivert og Ole Sande er far og son).

Sivert Sande er siviløkonom og kjem frå stillinga som kapitalrådgivar innan private banking i Sparebank 1 SMN.

Satsa på Sandsøya
I 2021 viste Sande og Bringsvor fram eit 1800 kvadratmeter nytt bygg på Sandsøya, ei investering på 44 millionar kroner. Det starta ei ny tidsrekning for selskapet, sa dei to då dei viste fram det nye bygget, som mellom anna utvida frysekapasiteten kraftig.

- Sjølv om kvaliteten på produkta har vore god, såg her tidlegare litt ut som ein gamal russisk hermetikkfabrikk. Vi var litt flaue over å vise fram anlegget, sa dei under omvisninga i det nye bygget.