Fiskarglede over Nergård-siger

- Vi syns det er positivt å få konkurranse om råstoffet, seier administrerande direktør Audun Maråk i Fiskebåt, bransje- og arbeidsgivarorganisasjonen for eigarane av havfiskeflåten.
Pelagia meiner det er ein klausul på eigdomen som hindrar Nergård å bygge anlegg der, men Pelagia tapte i retten.

Då styresmaktene sa ja til etablering av fiskeindustrigiganten Pelagia i januar 2014 gjekk Maråk ut og åtvara mot konsekvensane.
Frykta er at ein konsentrasjon på industrisida vil medføre at auksjonen ikkje fungere så godt som den burde gjere, sa Maråk til NETT NO.

Gjekk som frykta

Pelagia er resultatet av ei samling av Norway Pelagic, Welcon og Egersund Fisk til eitt selskap, med Austevoll Seafood og Kvefi som 50/50 eigarar. Kvefi er investeringsselskapet til laksemilliardæren Gustav Witzøe.
Maråk meiner det han var redd for i januar 2014 er akkurat det som har skjedd.
- Heilt klart, seier han. Konkurransen er blitt mindre og prisane har falle.

Bra for alle

Eit nytt anlegg for produksjon av fiskeolje og fiskemjøl i Vågsøy, og seinare eventuelt også eit nytt anlegg for bearbeiding av sild og makrell til menneskeføde, vil vere bra på alle vis, slik Maråk ser det.
- Det er sunt for marknaden, det er sunt for heile nasjonen, seier han.

Kan bli anke

Pelagiasjef Odd Magne Haugstad sa til NETT NO då dommen kom onsdag at ha hans umiddelbare reaksjon på dommen er at den bør ankast.
Pelagia meiner det er ein klausul på eigedomen der Nergård bygger sin nye fabrikk, som gjer at det ikkej kan etablerast konkurrerande verksemd til Pelagia sitt eige mjøl- og oljeanlegg like ved, men tingretten kom til stikk motsett konklusjon.
Maråk vonar dommen frå tingretten blir ståande.
- Vi får avvente og sjå om folk brukar fornuft eller ufornuft, seier han.