Flytrafikken dobla seg på Vigra

Onsdag slapp Avinor trafikktala for oktober, som har vore den første månaden der mange har hatt sjansen til å reise utanlands etter at reiserestriksjonane blei oppheva.

Tala viser at trafikken over Vigra lufthamn Ålesund dobla seg, samanlikna med same månad i fjor. Ved utgangen av oktober hadde 76.872 passasjerer reist over flyplassen.

– Størst vekst har utlandstrafikken med auke på 239 prosent. Rutene til Amsterdam, Gdansk, Kaunas og Alicante, saman med charteravgangane til Gran Canaria, opplyser lufthamnsjef Tor Hånde i ein e-post.

Framleis nær 30 prosent under 2019
Så langt i 2021 ligg passasjertala på Vigra likevel 6,5 prosent bak fjoråret på same tid med drygt 375.000 reisande, viser oversikta frå Avinor.

– Sjølv om passasjertala har auka kraftig for kvar månad som har gått samanlikna med fjoråret, er det fortsatt eit stykke opp til rekordåret 2019. I oktober var passasjertalet 28 prosent lågare enn same månad i 2019, men forskjellen til 2019 har minka for kver månad, fortel Hånde.

Opp i Ørsta og Sandane
Fleire enn 9200 passasjerar reiste via Hovden lufthamn i Ørsta, ei auke på 78 prosent frå oktober i fjor. Flyplassen har hatt ei auke i passasjertalet på drygt 12 prosent samanlikna med dei ti første månadene i fjor.

Sandane hadde ei auke på drygt 44 prosent, og ei auke på meir enn 17 prosent samanlikna med fjoråret.

Ned i Molde
78 prosent fleire reiste via Molde Årø i oktober samanlikna med same månad i fjor. Moldensarane har hatt ti prosent færre passasjar i år, samanlikna med i fjor.

Det samla passasjertalet for flytrafikken i Norge i 2021, er framleis meir enn 60 prosent lågare enn i 2019, som var det siste året som ikkje var påverka av koronapandemien.