Frå turisme til bygdeutvikling

- Lista er lagt høgt, seier dagleg leiar Ove Skylstad i Geiranger Utvikling.
Selskapet har nettopp hatt generalforsamling og skifta namn. Namneskiftet signaliserer kva selskapet skal drive med, utvikling av Geiranger som reisemål året rundt - mellom anna for å sikre grunnlag for busetnad, skule og barnehage.

Til hausten startar ein forstudie til ein masterplan for utvikling av Geiranger. Forstudien skal vere ferdig i løpet av hausten. Arbeidet med sjølve masterplanen skal starte før årsskiftet, med mål om å vere ferdig i løpet av eitt år. Planarbeidet blir finansiert av ei statleg løyving som kom i behandlinga av revidert nasjonalbudsjett i vår.

Geiranger først

Geiranger Utvikling er resultatet av ein omfattande prosess for å slå saman reiselivselskapa for Sunnmøre og Nordfjord. Det blei det ingenting av, og Destinasjon Geirangerfjord-Trollstigen låg an til å bli nedlagt då Nordal kommune og deler av reiselivet der heller såg mot Destinasjon Ålesund og Sunnmøre.
Då tok reiselivet i Geiranger over destinasjonsselskapet og satsa på å gjere det til eit instrument for Geiranger og reiselivet der.

Samarbeid

Geiranger Utvikling har gått i samarbeid med klyngeorganisasjonen NCE Tourism Fjord Norway om produktutvikling og Fjord Norge om internasjonal marknadsføring.
I marknadsføringa skal Destinasjon Geirangerfjord brukast som namn på selskapet.

Utvidar sesongen

Første steg på vegen mot større heilårsturisme er å få utvida sesongen i begge endar. Geiranger Utvikling sin jobb for å nå målet er å kartlegge kva Geiranger har, og bør få av tilbod, for å trekkje til seg reisande også utanom høgsesongen.
Reiselivsreiarlaget Fjords, som mellom anna driv bilferja frå Geiranger til Hellesylt forlengjer sesongen både vår og haust i år. Det er eit tiltak på vegen på mot heilårsturisme, og opnar mellom anna for nye rundturtilbod, seier Skylstad.