Får meir enn kompensert for kvotekutt

Gjennomsnittsprisen for torsk i siste 12-månadersperiode er opp 23 prosent, for hyse 78 prosent og for sei 52 prosent samanlikna med gjennomsnittsprisen i 2024 fortel Lerøy Seafood Group sin kvartalsrapporten for tredje kvartal.

Kutt i torskekvoten løftar prisen og det smittar og over på prisen for sei og hyse.

Denne prisutviklinga er hovudårsaka til at villfisksegmentet i Lerøy Seafood Group auka lønsemda både hittil i år og i tredje kvartal, samanlikna med tilsvarande tidsrom i 2024. (sjå tabell). Torsk er det økonomisk viktigaste fiskeslaget for Lerøy Havfisk og prisauken kompenserer mellom anna for eit 31 prosent kutt i torskekvota for Lerøy Havfisk sine to trålarar.

Tøft på land
I tillegg til Lerøy Havfisk omfattar forretningsområdet villfisk også fiskeindustriselskapet Lerøy Norway Seafoods. Lerøy Norway Seafoods driv fleire mottak og foredlingsanlegg i Nord-Noreg.

Medan fiskebåtreiarlaget tener på prisauken er den ei utfordring for industrianlegga til Lerøy Norway Seafoods. Akkurat som for reiarlaget er torsk det økonomisk viktigaste fiskeslaget for Lerøy Norway Seafood. Høgare prisar set press på lønsemda, og  mindre torsk gjer også drifta mindre effektiv. Likevel greidde Lerøy Norway Seafoods å oppnå same driftsresultat i tredje kvartal 2025 som i tredje kvartal 2025

Får svi for prisfall
Lerøy Seafood Group er eitt av dei største oppdrettselskapa i Noreg og har fått svi for prisfallet på laks i år. Ei nedskriving på 1,5 milliardar kroner på verdien på laks og regnbogeaure i anlegga er hovudårsaka til minusresultatet i årets ni første månadar.

Det var imidlertid verre per utgang av første halvår i år. Då var nedskrivingane 2,4 milliardar kroner. I tredje kvartal snudde det. Prisane er stigande igjen, og Lerøy kunne skrive opp verdien på fisk i sjøen med 0,9 milliardar kroner.