Første fiskerikontrakt med norsk reiarlag

Evotec har sikra seg si første kontrakt innan fiskeri til eit norsk reiarlag.

Ulsteinvik-selskapet skal levere ei større vinsjepakke til ein fiskebåt som skal byggjast ved Karstensens Skipbsværft i Danmark, ifølgje ei pressemelding onsdag.

Leveransen er den andre Evotec har til det danske verftet og den fjerde kontrakten innan fiskeri, der dei no satsar for fullt.

Det er reiarlaget Asbjørn Selsbane som har tinga det nye fartøyet, som vil få namnet «Stødig».

Leveransen frå Evotec omfattar alle vinsjar for tråling, snurrevad og fortøying.

– Utstyret er elektrisk og med svært effektiv drivlinje, som sikrar miljøvenleg fiskeri gjennom redusert energiforbruk og regenerering, heiter det i pressemeldinga.

Salssjef for fiskeri i Evotec, Håkon Woldsund, fortel i meldinga at det har vore ein grundig prosess saman med reiarlaget, som har hatt fokus på detaljar for å finne gode løysingar.

Evotec er eit selskap i Entec-gruppa, som har hovudkontor i Ulsteinvik. Dei leverer ulike handteringsløysingar til fiskeri, forsking, akvakultur og seismikk.