Gjeld på 162 millionar i Prodtex-konkurs

Tysdag har Møre og Romsdal tingrett opna konkurs i selskapet Prodtex Industri etter at selskapet meldte oppbod.

Konkursen blei varsla av selskapet sjølv dagen i forvegen, etter at det blei klart at forhandlingar med kreditorar ikkje lukkast.

Skyhøg gjeld
Gjelda i buet er anslått til drygt 162 millionar og verdiane til 76 millionar kroner. Det går fram av rettspapira.

Der blir det også opplyst at verksemda, som hadde 31 tilsette, er innstilt.

Espen Rekkedal er bustyrar i saka, men fortel til Nett No at det er for tidleg å gi fleire opplysningar.

Tysdag føremiddag hadde han ein kort innleiande samtale med styreleiar Kjersti Kleven. Spørsmål om korleis ting gjekk gale og eventuell interesse for buet, må advokaten difor kome tilbake til seinare.

Bygging av fiskemerdar velta økonomien
Styret har sjølv opplyst at årsaka var økonomiske problem ved bygginga av fleire store fiskemerdar ved anlegget på Fiskåholmen.

Dagleg leiar Sigbjørn Nordstranda fortalde til Nett No måndag at han ikkje ville utelukke ny drift, men at det var for tidleg å seie noko konkret.

– Vi har framleis trua på slik automatisert produksjon der designet er tilpassa automatisering, sa han.

Omsette for 63 millionar i 2022
Prodtex Industri blei starta i 2019 og hovuddelen av verksemda har vore produksjon av bruer ved hjelp av avansert robotsveising.

Den siste offentlege rekneskapen frå 2022 viser ei omsetning på 63 millionar og eit resultat før skatt på 1,3 millionar kroner.

Morselskapet Prodtex As med adresse i Ulsteinvik er ikkje råka av konkursen. Der ligg teknologien som selskapet har utvikla, og nytta til produksjonen i Vanylven.

Ordførar: – Trist for eit lite samfunn
Konkursen er mellom dei største i regionen på lang tid når det gjeld omfanget av verdiane involvert. For ei kommune som Vanylven, vil tapet av 31 industriarbeidsplassar merkast godt.

– Det er trist for eit lite samfunn med eit lite næringsliv. 31 tilsette er ein betydeleg arbeidsstokk i vår kommune, seier ordførar Paul Sindre Vedeld til Nett No.

Han blei informert om konkursen før nyheita blei kjent. Likevel har han ikkje heilt fått summa seg, over kva konsekvensar det kan få.

– Prodtex har også brukt mykje lokalt næringsliv under oppbygginga og utviklinga av anlegget, så dette kan også skade andre bedrifter i lokalsamfunnet, legg ordføraren til.

Pant i eigedommen
Etableringa av industriverksemda på Fiskåholmen i Vanylven blei teke svært godt imot. Då hadde industrihallen vore delvis tom i lengre tid.

Det konkursråka selskapet eigde industrihallen, som betyr at eigedommen i utgangspunktet går inn i buet.

Både banken og Innovasjon Norge har pant i eigedommen, har Nett No fått opplyst.