Gjorde inntektshopp utan meisterskap

Friidrettsutøvaren Karsten Warholm sitt selskap Sunn Vekst auka inntektene med meir enn 50 prosent – frå 3,6 til 5,6 millionar i 2020.

Det kjem fram i rekneskapen som no er lagt fram.

Dei første pengane starta å rulle inn på konto til selskapet med adresse i Ulsteinvik i 2019. Sjølv utan noko større meisterskap i pandemiåret 2020, blei det solid vekst – og lønnsemd (sjå tabell under).

Årsrapporten viser at selskapet fekk finansinntekter på nær 1,4 millionar i fjor. Det blei teke ut lønn og ytingar på til saman tre millionar i løpet av 2020.

(saka held fram under)

Firmaet er på fleire vis ei familiebedrift der Kristine Haddal – mora til Karsten – er dagleg leiar. Regnskapsføringa står mormora for og Karsten Warholm eig alle aksjane.

Selskapet har tre årsverk, Karstein sjølv, mora Kristina og trenar Leif Olav Alnes. Kristine Haddal opplyser i ei tekstmelding til NETT NO at det ikkje er planar om nokon endringar i drifta for augneblinken.

Inntektene til den ferske OL-meisteren kjem på ulike vis, både i form av utstyrsavtaler, sponsoravtaler, inntekter frå friidrettsforbundet og Olympiatoppen - og bonusavtalar frå ulike arrangørar og startpengar.

Etter årets sesong med OL-gull, vil pilene truleg peike vidare oppover for selskapet i 2021.