Hamnefogden fryktar tap på hundretals millionar

Dersom Ålesundregionens Havnevesen ikkje får fortøye store cruisesskip slik at dei stikk framfor Waterfront-hotellet, vil det gi tap for fleire partar.

Det sa hamnefogd Ole Christian Fiskaa i rettssaka mellom hotelletbygg-eigarane og hamnevesenet i Ålesund i dag, tysdag.

Når det kjem fleire store skip samstundes, fortøyer i dag hamnevesenet skip langs hamnevesenet si kai, Prestebrygga, og inn framfor hotelleigedomen mot vest. Det er bakgrunnen for at eigarane i Strandgaten Brygge har gått til søksmål.

Kan bli 100-120 færre skip
Om hamnevesenet ikkje kan fortøye skipa slik i framtida vil det gi tap for tre partar, forklarte hamnefogd Ole Christian Fiskaa i retten:

For hamnevesenet, for selskapet som leverer straum til skipa og for alle bedriftene som tener pengar når cruiseturistane går i land.

Eit forbod vil gjere at hamnevesenet ikkje kan fortøye to store skip samstundes, og igjen bety 100-120 færre anløp årleg, ifølgje hamnefogden si forklaring.

Anslår tap på 230 til 345 millionar
100-120 færre store cruiseskip til Ålesund i året gir eit årleg økonomisk tap på mellom 230 og 345 millionar kroner, meiner hamnefogd Ole Christian Fiskaa.

For hamnevesenet utgjer 100-120 færre besøk av store skip mellom 15 og 30 millionar kroner i tapte inntekter. For Plug Ålesund, som leverer straum frå land til skipa, utgjer det 15 millionar kroner i tapt inntekt.

I tillegg går bedrifter i regionen glipp av 200-300 millionar kroner inntekter frå turistar som i går i land dersom desse store skipa ikkje kjem, ifølgje Fiskaa si vurdering.

Utgjer store delar av inntektene
Inntektene frå cruiseskipa som fortøyer på sørsida av Ålesund sentrum utgjer over halvparten av inntektene til Ålesundregionens Havnevesen og deira økonomiske musklar, sa Fiskaa i si forklaring.

I år anslår han at hamnevesenet får 70 millionar kroner i inntekter frå cruisetrafikken. Det er ei auke frå 60 millionar kroner i fjor.

Meir om rettssaka:

Meiner praksisen er i tråd med avtaler
Eigedomselskapet Strandgaten Brygge som eig bygget, som mellom anna husar Waterfront-hotellet, er motparten til hamnevesenet.

Målet deira er å få slutt på at hamnevesenet fortøyer skip slik at dei stikk framfor hotellet - og sperrar for utsikta til gjestane deira.

Etter hamnefogden sitt syn er dagens praksis både innanfor tidlegare avtalar og regelverk. Å fortøye slik at skip delvis ligg i forlenginga av kaia, er ein heilt vanleg måte å utnytte infrastrukturen på, sa han.

Fiskaa viste til at hamnevesenet sine anlegg på Flatholmen i Ålesund og i Gjøsund i Giske er bygd slik at skip kan fortøyast ved at dei stikk ut i forlenginga av kaia.

Tvilar på utbygging mot aust
Hamnefogden drog óg i tvil motpartens argument om at det kan byggast 83 meter lenger kai mot aust, slik at det ikke lenger er behov for å fortøye skip så langt vest som i dag.

Det er så djupt der ei eventuell forlenging mot aust skal byggast, at Fiskaa tvilar på om det er fysisk råd å bygge på området. Dessutan kan ei slik utbygging kome i konflikt med ei framtidig utbygging på sørsida av Ålesund.