Har fått bod på Nogva Motorfabrikk-konsernet

Nogva Motorfabrikk-eigarane har fått eit bod på konsernet, og har innleidd ein såkalla due dilligence-prosess, der bodgivaren får utvida innsikt og tid til å gå gjennom selskapet.

- Det er ein prosess no som mest sannsynleg vil leie fram til at det blir ein ny majoritetseigar. Det blir ein endeleg avklaring ut på hausten - medio oktober, seier dagleg leiar og medeigar Kjell Norvoll i Nogva Motorfabrikk til Nett No.

Tidkrevande prosess
I september i fjor vart dei tilsette orientert om at eigarane vurderte eit sal. Då håpa Norvoll på ei kjapp avklaring, men seier no at stor interesse har medverka til at prosessen har tatt lengre tid enn han først venta.

Han kommenterer ikkje bodet ut over å seie at det kom eit bod som var der det burde vere. Avgjerda om å starte ein due dilligence-prosses vart teken før sommarferien.

I fjor sa Norvoll at det var to vilkår for at det skal bli eit eigarskifte. Pris er det eine, men viktigare vat rett kjøpar.

- Ein rett kjøpar er ein kjøpar som tek selskapet vidare. Vi er ein soleklart marknadsleiar i Noreg. Eg trur at veldig mykje av den vidare veksten for Nogva-konsernet vil kome til å skje utanfor landet, sa Norvoll.

Familieigd
Selskapet leverer motorar, gir, propellar og overvakingtenester til utstyret, i tillegg til å utføre service-, vedlikehald og reparasjonar. Hovudkontor og hovudanlegg ligg i Søvika i Haram.

I dag har selskapet fleire eigarar, som er i familie.

Kjell Norvoll og ektefellen Anne K. Nogva Norvoll eig 50 prosent gjennnom selskapet Nogva Norvoll Invest.

Kåre Arnt Nogva eig 11 prosent gjennom selskapet Kano Invest, Lars Åge Nogva 10 prosent gjennom Lano Invest, Kirsti L. Nogva Mårstøl 10 prosent gjennom Klnm Invest, Astrid Karin Nogva 9,545 prosent gjennom Akn Invest og Skjalg Longva 9,455 prosent gjennom Skjano Invest.

Ny vekst i år
Driftsinntektene i fjor er dei høgaste konsernet har hatt, og så langt i år ligg inntektene "eit godt stykke over" tilsvarande periode i fjor, seier Norvoll.

Også lønsemda steig frå 2022 til 2023, og resultatet før skatt utgjorde i fjor 12,4 prosent av driftsinntektene.