Har pussa opp store delar av hotellet

Ved Scandic Parken i Ålesund er det hektiske sommarveker. Samtidig som hotellet har ferierande turistar på besøk, har dei ei pågåande renovering av fleire fellesområde.

– Vi gjer ein totalrenovering av bankettsalen og lobbyområdet i 2. etasje i det vindauget vi har i sommar, fortel hotelldirektør Sven Erik Moe til Nett No.

Med få arrangement om sommaren, passar det bra å ta desse områda no. Tidlegare har dei pussa opp inngangspartiet og fellesområde i 1. etasje, i tillegg har fleire etasjar med hotellromma fått eit skikkeleg ansiktsløft.

– Vi har brukt store summar på vedlikehald dei siste to-tre åra, og teke to etasjar med rom kvart år. Til neste år har vi planar om å pusse opp 46 nye rom, seier Moe.

Meir effektivt og kan få betre betalt
Hotellet vart sist totalrenovert i 2008, så hotelldirektøren meiner det var på tide med eit meir moderne utsjånad. Lysare og freshare seier Moe om designet.

Høgare standard gjer både at hotellet kan ta seg betre betalt frå gjestane – og at dei kan drive meir effektivt når det gjeld energibruk.

Hotelldirektøren synest både dei sjølve og konkurrentane i regionen har blitt flinkare til å ta skikkeleg betalt jobben dei gjer.

– Vi har i alt for mange år teke oss for lite betalt, og prisane på hotellrom har meir eller mindre stått stille i fleire tiår, seier han.

Omsette for nær 100 millionar
Omsetninga til hotellet i fjor, var oppunder 100 millionar, slik den har vore dei siste åra. Moe er nøgd med eit resultat før skatt på kring 3,6 millionar og påpeiker at det samtidig er nytta betydelege ressursar i oppgraderinga av hotellet.

Sett vekk frå det ekstraordinære overskotet etter «pandemiåret» 2021, er overskotet mellom dei største hotellselskapet har levert.

«Bra køyr» i sommar
Selskapet som står for drifta heiter Hotelldrift Ålesund, og er eigd av Brødrene Jangaard som igjen er ein del av Haagensen-familiens konsernselskap, Aalesund Enterprises.

I alt var det sysselsett 54 årsverk i hotellbedrifta i fjor, ifølgje årsmeldinga.

Hotelldirektøren fortel at det er «bra køyr» i sommar og at dei ligg godt an samanlikna med tidlegare år.

Minus for 1904 – pluss for Noreg
Haagensen-familien eig også Hotel Noreg og 60 prosent i Hotel 1904.

Begge desse selskapa hadde betydeleg auke i omsetninga i 2023. Førstnemnte fekk eit lite minus på botnlinja, medan sistnemnte enda med eit lite overskot i fjorårets rekneskap (sjå tabellar under).