Har sprøyta inn nye midlar i restaurantdrift

Tik Café & Restaurant halverte underskotet i fjor, samanlikna med året før. 

Likevel trengde Ørsta-restauranten meir pengar frå eigarane etter eit tap på drygt 900.000 kroner i 2024. 

Driftsinntektene steig samtidig til 9,1 millionar kroner – opp ein drygt million frå 2023 (sjå tabell under).

«Vil tilføre nødvendig kapital»
Det er brørne Jan Endre og Sindre Vartdal som eig restaurantselskapet, og planen er å halde fram med støtta gjennom selskapet  Brødrene Vartdal.

«Likviditeten i selskapet er anstrengt, men aksjonær vil tilføre nødvendig kapital til videre drift ved behov», heter det i årsmeldinga. 

– Vi meiner og trur at det å skape eit levande Ørsta, å skape ein samlingsplass for folk, det er det som skal til for å utvikle kommunen. For vår sin del er det eit bidrag vi kan tillate oss i ein periode, for å skape den samlingsplassen, sa Jan Endre Vartdal til Nett No etter underskotet i 2023. 

Han er dagleg leiar og medeigar i Vartdal Plast saman med søskena Sindre og Ingvild. 

Strammar inn på personalbruk
I årsmeldinga blir det opplyst at arbeidet til styret i fjor i hovudsak var å forvalte inntekter og redusere kostnader for å sikre den pågåande drifta. 

Det er lagt opp til ei innstramming i personell i 2025. 

Eigenkapitalen i restaurantselskapet var positiv ved utløpet av året, men det blir vist til at det er usikkerheit kring den vidare drifta. 

God kommunikasjon og eit konservativt anslag om inntekter i åra som kjem, gjer at styret konkluderer med at det er grunnlag for å halde fram.