Sikrar restaurantdrift i Ørsta

Ved utløpet av 2023 gjekk Jan Endre og Sindre Vartdal inn med ein halv million kroner i lån i Tik Café & Restaurant, som dei eig gjennom selskapet Brødrene Vartdal.

Planen er å halde fram med å støtte selskapet.

- Vi meiner og trur at det å skape eit levande Ørsta, å skape ein samlingsplass for folk, det er det som skal til for å utvikle kommunen. For vår sin del er det eit bidrag vi kan tillate oss i ein periode, for å skape den samlingsplassen, seier Vartdal om eigarskapen i Tik Café & Restaurant.

Han er dagleg leiar og medeigar i Vartdal Plast saman med søskena Sindre og Ingvild. Saman med broren er han også investor i eit større bustadsprosjekt i Ørsta sentrum.

Tøft år
Tik Café & Restaurant blei starta i 2022, etter at Fugl Føniks, som held til i same lokala, melde oppbod.

Dei to første år har vore tøffe økonomisk og i fjor vart underskotet 1,8 millionar kroner (sjå tabell), slik at selskapet er avhengig at eigarane stiller opp.

«Likviditeten i selskapet er anstrengt, men aksjonær vil tilføre nødvendig kapital til videre drift ved behov. Driften av Tik Café & Restaurant As synes således ikke å medføre vesentlig risiko for tap for kreditorene», skriv selskapet i årsmeldinga for 2023.

I år er det auke i besøket, større breidde i kundegruppa og betring i økonomien, ifølgje Vartdal.

– Det er lang frå i pluss, men vi ser ei positiv utvikling også i økonomien, seier han om utviklinga i 2024.

Nær balanse
Vartdal seier han og broren er innstilt på at det tek tid å utvikle restauranten og løfte lønsemda, i alle fall til eit resultat pluss/minus i balanse.

Draumen fram i tid er å få inn eigarar som også vil stå for drifta, men dei har ikkje sett nokon fristar.

Anastasiia Lysina. blei tidlegare i år tilsett som vert, etter at Joanne Picton Aarseth hadde vore dagleg leiar sidan oppstarten.