Hatløy sluttar i Norwegian Rooms

Oddbjørn Hatløy har leia klyngeorganisasjonen Norwegian Rooms sidan den blei etablert. No tek styreleiar Jon Daniel Nesje over som dagleg leiar medan organisasjonen leitar etter ein erstattar for Hatløy.
- Det er ein midlertidig situasjon, seier Nesje om si nye rolle.
Norwegian Rooms starta som ein klynge-organisasjon for bedrifter innan møbel- og interiørbransjen, men utvikla seg undervegs til å bli ein organisasjon som femner om all ferdigvareindustri.

Satsar på NCE-status

Norwegian Rooms har hatt Arena-status i fem år, det lågaste nivået i den offentleg finansierte klyngeprogrammet.
Det betyr at klynga i fjor var komen til vegs ende, og måtte rykke opp til NCE-status (Norwegian Centre of Expertice) om den framleis skulle få offentleg finansiering. Det lukkast den ikkje med. Medan klyngeorganisasjonen for biomarine bedrifter, som også har base hos ÅKP i Ålesund, kunne juble over opprykk til NCE-status i november i fjor måtte Hatløy og medlemane i Norwegian Rooms konstantere at det blei avslag.

Nesje seier det viktigaste for styret og ein nye leiar blir å få gjennomslag for ein ny søknad om NCE-status.

Satsa vidare

Då Norwegian Rooms fekk avslag på søknaden om NCE-status avgjorde medlemane at dei skulle finansiere drifta vidare, fram mot ein ny søknad til hausten.
- Dei er offensive i forhold til vidare drift, i den forstand at dei går inn med privat finansiering av drifta i 2019. I det ligg det ei klar forventning og ambisjon om å søkje NCE i 2019, sa Hatløy til NETT NO i november i fjor.
NCE-status sikrar fem millionar kroner i årleg statleg støtte i fem år framover.

Går over til ÅKP

Hatløy går over til ein ny stilling i ÅKP, som seniorrådgivar med ansvar for klynger og entreprenørskap.
Han skal mellom anna vere sparringspartnar for klyngene på ÅKP, arbeide med nye nettverk knytt til ÅKP og med digitaliseringa i næringslivet.

- Det var ein stilling som tiltalte meg, seier Hatløy om jobbskiftet.