Havila Kystruten-emisjon i boks

- Det var solid interesse for emisjonen, seier konstituert dagleg leiar Arne Johan Dale i Havila Kystruten i ei pressemelding.

I følgje Dale skal Sævik-familien eige 60,4 prosent av aksjane i Havila Kystruten etter kapitalutvidinga. Aksjekursen i kapitalutvidinga blei 25,50, slik selskapet og rådgivarane Fearnley Securities og SpareBank1 Markets gjekk ut med på førehand.

Det verdset Havila Kystruten til 1,27 milliardar kroner, etter kapitalutvidinga.

Sævikfamilien eig Havila Kystruten gjennom holdingselskapet sitt, Havila Holding.

Finansiere skip
Poenget med kapitalutvidinga er å sikre at Havila Kystruten har nok pengar til å gjere klar og å sette i drift dei fire kystruteskipa som er under bygging ved Tersan-verftet i Tyrkia.

Det første av dei fire, Havila Capella, er venta levert frå verftet i løpet av dei næraste vekene, skriv Havila Kystruten og Havila Holding i ei felles pressemelding.

Havila Capella er på sjøen igjen, etter å ha vore i dokk for utvendig måling.

Går på børs
I samband med kapitalutvidinga søkjer selskapet også om å bli notert på Euronext Growth. Vender børsen tommelen opp kan selskapet vere børsnotert i løpet av juli/august.

Dale seier i pressemelding at kapitalinnhentinga er starten på ei ny epoke i Havila Kystruten: "Med forventninger om stadig oppmykning av reiserestriksjoner, samt levering av de første skipene, vil selskapet endelig kunne tilby passasjerer verdens vakreste sjøreise".

Sævik-familien eig i dag Havila Kystruten gjennom selskapet Havila Holding. Havila Holding eig 33,44 prosent i Bakkar og Berg Media as,. som gir ut NETT NO.