Held tempoet oppe i husbygginga

- Dei siste par åra har vi konsentrert oss mest om dei andre kommunane i regionen, seier dagleg leiar Henning Heltne og salssjef Odd Magne Velsvik.
Trass i eit par rolege år i Herøy, har Mesterhus likevel levert om lag femti bustader i Herøy dei siste fem åra. Dette gjer Mesterhus-representantane Tømrer Service og Tømrer Prosjekt til Herøy sine viktigaste bustadutviklarar.

60 bustader i året

Volda-selskapet opererer som bustadutviklarar med heile søre Sunnmøre som satsingsområde. Dette har dei siste åra resultert i ein årleg leveranse på om lag 60 bustader til saman i Ørsta, Volda, Ulstein, Hareid og Herøy.
I fjor og til no i år har mykje av kapasiteten gått med til å bygge ut to byggefelt i Ulsteinvik med til saman over 50 bustader, samt 44 bustader fordelt på to felt i Volda. I tillegg til dette er det også levert ein del enkelthus ulike plassar i distriktet.

Høgt tempo

Salssjef Odd Magne Velsvik, som har vore kåra til toppseljar innafor Mesterhus-systemet, aktar ikkje å slakke på tempoet.
- Resten av 2014 og neste år vil aktiviteten vår i Herøy auke betydeleg igjen, seier Velsvik, som er glad for å ha funne løysing på nokre arkeologiske utfordringar som har vore tidkrevjane i Fosnavåg-området.
Dermed ligg det meste no til rette for oppstart med utbygging av to konsentrerte bustadmiljø i utkanten av Fosnavåg med ein samla kapasitet på knapt tretti bueiningar fordelt på 2- og 4-mannsbustader samt ei lavblokk.
Oppstarten for det første er planlagt etter sommarferien.

*