Her treng dei nye kollegaer

Torsdag arrangerer NAV Møre og Romsdal digital jobbmesse med kring 30 arbeidsgjevarar som treng folk til om lag 100 ledige stillingar.

– På den digitale jobbmessa vil arbeidssøkarar få anledning til å oppsøke stands, snakke med ulike arbeidsgjevarar, avtale intervju og søke på utlyste stillingar. Akkurat som dei ville gjort om det var ei fysisk jobbmesse, opplyser seniorrådgjevar Tove M. Gustad i NAV Møre og Romsdal.

Det er no 3.931 heilt arbeidslause i Møre og Romsdal, som svarar til 2,8 prosent av arbeidsstokken. Størst er arbeidsløysa mellom folk innan industri, reiseliv og transport og bygg- og anlegg, viser ferske tal frå NAV (lenke til pdf).

Treng fleire nye tilsette
Mellom dei som har behov for folk i fleire nye stillingar er Myklebust Verft i Sande og entreprenørane i Aurvoll og Furesund i Herøy.

Verftet har behov for både industrirøyrleggjarar, platearbeidarar, sveisarar, kranførarar, arbeidsleiarar og servicemedarbeidarar. Hos entreprenørselskapet treng dei byggingeniør/geomatikar, røyrleggarar, anleggsarbeidarar og hjelpemannskap.

Elles er det eit bredt spekter av ulike bransjar som er representert.

(Sjå oversikt under)

Første digitale messe
Dette er første gongen det blir arrangert ein digital jobbmesse i Møre og Romsdal.

Deltakarar kan registrere seg på jobbmesse.no og opprette brukarprofil. Sjølve messa varar i to timar frå klokka 13.

Under messa kan jobbsøkjarane chatte eller ha videosamtaler, eller utveksle CV-ar og søknadar. Arbeidsgjevarane har sin eigen digitale stand der dei kan legge inn video og informasjon, i tillegg til stillingsannonsar.

(Sjå arbeidsgjevarar som kjem under).

Desse arbeidsgjevarane har meldt seg på:

Gulla Transport i Surnadal (transport, sjåførar klasse CE).

Dalsegg Transport, Surnadal (transport, sjåførar klasse CE).

Myklebust verft, Sande (industrirøyrleggjarar, platearbeidarar, sveisarar, kranførarar, arbeidsleiarar og servicemedarbeidarar).

Sletta Verft, Aure (skipsrøyrleggjar, røyrleggjar, sveiser, platearbeidar).

Adecco, bemanningsbyrå (ulike stillingar).

Ringholmen Sjøhus, Aure (kjøkkensjef, servitør).

Smøla Næringsforening (ulike stillingar fra Hopen Brygge - dagleg leder/kokk, Promek - skipsingeniør, Økonomitjenesten no. – regnskapsførarar, Langset Rør - VVS-røyrleggjarar, Atlantic Dawn Seafood - teknisk assistent, Edøen Mek - mekanikar, Moe Maskin og Transport – anleggsmaskinførar).

Brødrene Langset, Norge (stillingar innan verft, olje og gass).

Aurvoll og Furesund, Herøy (byggingeniør/geomatikar, røyrleggjarar/bas, anleggsarbeidarar, hjelpemannskap).

A. Våge, Volda (betongarbeidarar).

Aasen Reinhald, Herøy (reinhaldarar).

Fafe – Hauer, Ålesund og Molde (transport, sjåførar).

Hauken Handverktenester, Volda (målarar, tømrarar).

Gjermundnes VGS, Vestnes (stillingar innan undervisning).

Ståle Berge VVS, Herøy (røyrleggjarar).

Smøla kommune (stillingar som fagarbeidar skule, diverse ferievikarar, lærar, lærling helse, lærling barne og ungdomsarbeidar, miljøterapeut skule, sjukepleiarar, arealplanleggjar, barnehagelærarar, ergoterapeut, byggesaksbehandlar, fagarbeidarar barnehage).

Landbruk Nordvest, Møre og Romsdal (avløysar landbruk).

Handverksbygg, Ulstein (tømrarar).

Din Bemanningspartner, Herøy (bemanning til fiskeindustri).

Polarbad Vest, Ålesund/Molde (kunderettleiar/seljar i Molde).

Pro Stål, Florø (industrirøyrleggjarar, sveisar, platearbeidar, snekkar, skipsrøyrleggjar, stillasarbeidar, målar).

Veidekke Bygg, Volda (bygningsingeniør, betongarbeid, tømrar).

Manpower, bemanningsbyrå (stillingar innan barnehage, sveis, automasjon med fleire).

Løvold Transport, Vanylven (sjåfør CE vogntog).

PE Bjørdal, Ørsta (sveisarar, reisemontørar, industrimekanikarar og maskiningeniørar. Lærlingar innan sveis, industrimekanikar og automasjon).

Viamille Statoil, Fiskå (stillingar innan catering, motell, heimeteneste).

Norsøk - Norsk Senter for økologisk landbruk, Tingvoll (rådgjevarstillingar innan landbruksforsking og formidling).

Atlantic Seafood (operatørar fiskeindustrien).

Varde, Kristiansund.