Ho blir ny næringssjef i Ørsta

Sigrun Heltne Vartdal blir ny næringssjef i Ørsta frå 1. september. Det kjem fram i en pressemelding torsdag.

Ho har vore banksjef for bedriftsmarknaden i Sparebank 1 SMN og gler seg til å starte i sin nye jobb.

– Vi er i ein kjempespennande region og Ørsta er ein veldig spennande kommune som har alt frå handel til storindustri, til turisme og landbruk. Eg er stolt av å bu her og gler meg til å løfte næringslivet vidare, seier Heltne Vartdal til Nett No.

– Kan neppe finnast ein betre kandidat
Odd Magne Vinjevoll som har vore næringssjef i Ørsta i 12 år, gjekk av som pensjonist i vår. Sidan har Einar Holsvik vore konstituert i stillinga. Framover skal han vere styreleiar i Ørsta Næringskontor.

– Det kan neppe finnast ein betre kandidat til å løfte næringslivet i Ørsta vidare fram, seier Holsvik i ein kommentar - og takkar samtidig Vinjevoll for innsatsen.

Han fortel at dei hadde ein god søknadsprosess med mange gode kandidatar. No er han trygg på at næringslivet i kommunen får på plass ein leiar som sørgjer for god drift vidare.

– Opplever ei veldig stor optimisme
Ørsta kommune er også med i styret av næringskontoret ved at ordførar Per Are Sørheim går inn i nestleiarvervet.

Han fortel at det er gjort mykje godt arbeid for å målretta utvikle næringslivet i kommunen gjennom fleire år. Mellom anna har den årlege Næringskonferansen fått stadig meir merksemd, samtidig som det har vekse fram uformelle møteplassar som på utestedet Tik i sentrum.

– Eg opplever ei veldig stor optimisme i næringslivet, og med ny næringssjef har vi ein viktig brikke på plass for det vidare arbeidet, seier Sørheim.

– Ein skal ikkje legge skjul på at det også er utfordringar for næringslivet med skatt og eigarskap. Vi er nøyd til å satse på næringslivet om vi skal ha noko å leve av framover – så i dag er ein veldig bra dag, legg han til.