I desse yrka er det størst behov for folk

(NPK-NTB-Anne Marjatta Gøystdal): Verksemder over heile landet slit med å rekruttere folk. Det er ikkje nok sjukepleiarar, snikkarar, kokkar og IT-programmerarar å få tak i.

Nav anslår at det manglar arbeidskraft som svarer til meir enn 70.000 personar. Det er over 24.000 fleire enn på same tid i fjor. Knappleiken på arbeidskraft var høgare i vår enn før pandemien.

Utviklinga er den same over heile landet og innan ei rekkje sektorar, viser Navs årlege bedriftsundersøking.

Rekordmange opplever rekrutteringsproblem. Til saman svarer 27 prosent av verksemdene at dei har hatt problem med å få tak i folk med rett kompetanse dei siste tre månadene.

– Dette er med god margin den største prosentdelen sidan vi byrja å stille dette spørsmålet i 2012, heiter det i rapporten som vart lagt fram onsdag.

Mange opplyser at dei ikkje fekk tilsett nokon då dei lyste ut stilling. Andre svarer at dei enda med å tilsetje nokon med lågare eller annan formell kompetanse enn dei søkte etter.

Det er størst underskot på:

• Sjukepleiarar, helsefagarbeidarar og spesialsjukepleiarar.
• Tømrarar, snikkarar
• Kokkar
• Programvareutviklarar
• Butikk- og salsmedarbeidarar
• Servitørar
• Legespesialistar

Berre innan yrkesgruppa helse, pleie og omsorg manglar det 15.750 personar. Den klart største gruppa er sjukepleiarar. Her er det behov for nesten 6.000 fleire.

– Mangelen innan denne yrkesgruppa har vore høg i fleire år. Mangelen har gått ytterlegare opp dei siste åra, skriv Nav.

Press innan bygg og anlegg
Dernest følgjer bygg- og anlegg. Nav beskriv ein vesentleg auke det siste året. Det blir anslått at det i vår har vore 11.500 personar i manko. Særleg tømrarar og snikkarar er etterspurde, men også betongarbeidarar, røyrleggjar og VVS-montørar.

Nesten ei av tre verksemder i bygg og anlegg melder om problem med for få kvalifiserte søkjarar. Størst er presset i Buskerud, Asker og Bærum og i Rogaland.

Nav påpeikar at råvareprisane har stige kraftig etter at krigen braut ut i Ukraina. Det får ringverknader for verksemdene. Undersøkinga vart gjennomført på seinvinteren, og ho fangar ikkje nødvendigvis opp effekten av dette. Tala for denne næringa må derfor tolkast med dette atterhaldet.

Låg arbeidsløyse
Talet på arbeidsledige har gått kraftig ned. Det har ikkje vore registrert så få ledige her i landet sidan 2008. Dei låge arbeidsløysetala gjeld på tvers av dei fleste yrkesbakgrunnar.

Relativt til kor mange personar ein manglar innan dei enkelte yrka, er det likevel nokre som skil seg ut. Det er særleg helse, pleie og omsorg, og dessutan ingeniør og IKT-fag. Mangelen er fleire gonger så stor som talet på ledige med relevant bakgrunn.

Bedriftsundersøkinga gir eit bilete på kva verksemder og bedrifter spør etter. Den gir også innsikt i kva bemanningsbehovet blir framover.

– Kunnskap om kva typar kompetanse arbeidsgivarar har problem med å få tak i, er viktig for at Nav skal kunne yte god service, heiter det i rapporten.

Høge forventningar
Undersøkinga speglar optimisme og høge forventningar i mange bransjar. 31 prosent av verksemdene ventar å auke bemanninga det kommande året. 9 prosent trur det blir nedskjering, medan 60 prosent ikkje ventar endring. Det er størst andel som forventar oppbemanning i Trøndelag, Oslo og Vestfold og Telemark.

Sterkast er optimismen i industrien, spesielt innan produksjon av elektriske og optiske produkt. Alle industrinæringar er meir optimistiske i år enn i fjor.

Også innan overnatting og servering er det fornya framtidstru. Heile 44 prosent meiner det ligg an til auka sysselsetjing i verksemda deira det neste året. I perioden januar til april vart det registrert meir enn dobbelt så mange ledige stillingar innan overnatting og servering som i same periode i fjor.

– Etter at smitteverntiltaka har vorte fjerna, er det tydeleg at næringa ventar auka etterspurnad, skriv Nav.

Undersøkinga vart gjennomført frå 1. februar til 21. mars i år. Ho er basert på eit utval på 10.828 verksemder som er trekt ut frå bedrifts- og føretaksregisteret.

(©NPK)