I gang med første byggesteg

På industriområdet i Barstadvika, mellom Måløy og Raudeberg, er bygginga i gang på første av tre byggesteg av eit landbasert lakseoppdrettsanlegg.

Målet er å sette ut den første fisken i fjerde kvartal i år og slakte i fjerde kvartal neste år. Når anlegget er heilt ferdig skal det kunne produsere 15.000 tonn i året og også omfatte eige slakteri og vidareforedlingsanlegg.

Sirkulerer vatnet
Anlegget blir bygd som eit såkalla RAS-anlegg. Det betyr at vatnet i anlegget skal resirkulerast og berre skiftast ut i små mengder om gangen. Fordelen er mellom anna at det er billegare å halde stabil temperatur i eit RAS-anlegg.

Ein av grunnane til at anlegget skal byggast i fleire steg er at selskapet vil bruke tid på å lære opp tilsette i teknologien som blir brukt.

Hentar pengar
Første byggesteg, som omfattar to bygg og tre tankar, kostar omlag 120 millionar kroner.

Det blir finansiert med tilsaman 58 millionar kroner i lån og tilskot frå Innovasjon Norge og Sparebanken Vest. 62 millionar er eigenkapital. 38 millionar av eigenkapitalen er på plass, og selskapet arbeider med å hente inn ytterlegare 24 millionar kroner i desse dagar, fortel styreleiar og medeigar Ronny Almenning.

Til andre byggesteg vil den samla investeringa kome opp i rundt 900 millionar kroner, og når anlegget er heilt ferdig vil det vere investert tilsaman 1,8 milliardar kroner i Barstadvika.

Lokale eigarar
Det er selskapet Ofs Norge i Måløy, med datterselskap, som er primus motor i utbygginga.

Ofs Norge eig Ofs Måløy, som eig konsesjonen til å drive oppdrett og er driftselskapet. Ofs Norge er også største eigar teknologiselskapet Ontec.

Ofs Norge har i dag 20 aksjonærar, med Ronny Almenning sitt selskap RMA Invest som den største (omlag 35 prosent etter kapitalinnhentinga som pågår no.

Investeringselskapet A.H. Holding i Vesterålen er neste største eigar, før Johan Oksholen selskap Noas Invest og Jon Ove Stokke. Stokke og Almenning bur i Måløy, Oksholen i Ålesund der han er styremedlem og medeigar i eksportselskapet Nor Seafoods.

Planen er å gjennomføre ytterlegare kapitalutviding for å finansiere andre og tredje byggesteg og gjerne retta mot investorar som også har industrikompetanse, seier Almenning.