Konkurs for forskingsenter

Det er styret i Stiftelsen Måløy Marine Ressurssenter som har gått til skifteretten og bedt om at det blir opna konkurs i stiftinga.

Gjelda er på 2,48 millionar kroner medan verdiane i stiftinga er på 1,8 millionar. Betalingsvanskane til stiftinga er ikkje forbigåande, heiter det i kjennelsen frå retten.

Reknskapen for 2021 viser 5,8 millionar kroner i inntekter og eit underskot før skatt på 0,8 millionar kroner. Ved inngangen til 2022 var stiftinga sin bokførte eigenkapital blitt negativ. I 2020 var underskotet to millionar kroner.

Optimisme
– No kan vi gå i gang med å skapa eit marint forskingssenter i Sogn og Fjordane. Eit slikt senter vil skapa mange attraktive arbeidsplassar, eit meir variert arbeidsliv og eit levedyktig samfunn på kysten.

Det sa dagleg leiar Randi Humborstad i næringsutviklingsselskapet Måløy Vekst og dåverande dagleg leiar i stiftinga, Roger Bergset, i ei felles pressemelding i 2018 etter at fylkestinget i Sogn og Fjordane vedtok å løyve 15 millionar kroner til Måløy Marine Ressurssenter.

Rekruttere
Ifølgje nettsida til Måløy Marine Ressursenteret skulle senteret mellom anna medverke til å rekruttere høgt utdanna folk til Måløy.

Dette fortel nettsida: "MMR skal skape et marint forskningsmiljø for effektiv næringsrelevant forskning med høy nytteverdi. MMR skal skape langsiktig rekruttering av høyere kompetanse innen marin sektor og bidra til verdiøkning i fiskeri- og havbruksnæringen. MMR skal samarbeide tett med Måløy vidaregåande skule som har fylkesdekkende linjer for utdanning innen fiskeri- og havbruk, og som har blitt tildelt en undervisningskonsesjon for oppdrett av laks og ørret, driftet av Marine Harvest."

Etter at denne artikkelen blei publisert har NETT NO snakka med styreleiar Trond-Inge Kvernevik.

Han seier styret vil konsentrere seg om å hjelpe bustyraren og at han ut over det ikkje har nokon ytterlegare kommentarar no.