Kostnadshopp på prinsesse-bryllaup

At prinsesse Märtha Louise og Durek Verret gjekk til Hotel Union Geiranger for å få arrangert bryllaupet sitt utløyste mellom anna ein oppussing av 120 rom og oppgradering av teknisk infrastruktur i hotellet. 

Eit års tid hadde vertskapet, Monja og Sindre Mjelva på seg for å få alt i stand, fram til bryllaupet i august i fjor.

Det var snakk om arbeid og investeringar hotellet normalt ville gjort over fem til sju år, seier Mjelva. No hadde dei eitt års tid på seg.

– Vi forserte mykje arbeid, seier Sindre Mjelva. 

Fleire tilsette
Det betydde mellom anna investeringar og ei oppbemanning, som auka lønskostnadane frå 56 til 68 millionar kroner. Det er hovudårsaka til resultatnedganen i fjor, ifølgje Mjelva. I år er hotellselskapet attende på eit meir normalt kostnad- og bemanningsnivå, seier han.

Talet på sysselsette årsverk steig frå 95 til 109 i fjor.

– Hotellfagleg er det kanskje det mest ekstreme vi har gjort, seier Mjelva om bryllaupsarrangementet og kallar oppdraget både kjekt, spennande og utfordrane.

Drift og eigedom
Morselskapet i  Hotel Union Geiranger-konsernet er SM Buick Holding, med Sindre Mjelva som eigar.

I tillegg til driftselskapet omfattar konsernet tre eigedomsselskap med driftsselskapet som leigetakar. 

I fjor kjøpte konsernet også Fossen Camping i Geiranger, som ligg melllom hotellet og turistattraksjonen Flydalsjuvet.